წლების წინ, სატელევიზიო სერიალში მონაწილეობა, კინოს მსახიობისთვის დამამცირებელი და შეურაცხმყოფელიც კი იყო, დღეს ყველაფერი შეიცვალა. კინოდან ტელევიზიაში ნელ-ნელა საკულტო რეჟისორებმაც და მსახიობებმაც კი გადმოინაცვლეს.

შორს რომ აღარ წავიდეთ გავიხსენოთ:

  • FX-ის სერიალი ამერიკული საშინელებათა ისტორია და მისი მსახიობები - ჯესიკა ლანგი და ქეთი ბეიტსი,
  • დაუნტონის სააბატო და მეგი სმიტი,
  • ბანქოს სახლი და კევინ სპეისი,
  • ქეით უინსლეტის ერთ-ერთი საუკეთესო როლი სერიალში მილდრედ პირსი

და მრავალი სხვა.

სულ მალე კინო ეკრანიდან სატელევიზიო ეკრანზე ჰოლივუდის ორი A კლასის ვარსკვლავი გადმოინაცვლებს - ჯულიანა მური და რობერტ დე ნირო.

ისინი დევიდ ო. რასელის ახალ სერიალში ითამაშებენ.

პროექტი უკვე მზად არის, თუმცა დეტალები ჯერ გასაიდუმლოებულია. უცნობია ის არხიც, რომელზეც სერიალი გავა. თავად რასელის თქმით, მასთან თანამშრომლობის სურვილს რამდენიმე ტელევიზია გამოთქვამს. რასელი ამბობს, რომ არჩევანი ძალიან რთული გასაკეთებელია, რადგან ყველაზე მნიშვნელოვანია არხმა დააკმაყოფილოს მოთხოვნები, რომელიც მინი სერიალის გადაღებას და უმაღლესი დონის სამსახიობო შემადგენლობას სჭირდება.

დეივიდ ო. რასელი, რეჟისორი ისეთი ფილმებისა როგორებიც არის - “იმედის სხივთა კრებული”, “ამერიკული აფერა”, “ჯოი” და მოკლედ რომ ვთქვათ ადამიანი რომელმაც ჯენიფერ ლოურენსს დიდება, ოსკარი და მილიონები მოუტანა.