პარლამენტის თავმჯდომარეს, ირაკლი კობახიძეს მიაჩნია, რომ მათ მიერ დასახელებული კანდიდატი აუცილებლად გაიმარჯვებს საპრეზიდენტო არჩევნებში, ხოლო ოპოზიციას გამარჯვების შანსი არ აქვს.

"არის მთლიანობაში გარკვეული მაჩვენებელი, რომელსაც აფიქსირებს ოპოზიცია წინა არჩევნებში და მე დიდ სხვაობას წინა არჩევნებთან შედარებით არ ველოდები", - ამბობს კობახიძე.

კობახიძემ 24 აგვისტოს განაცხადა, რომ ქართული ოცნება საპრეზიდენტო კანდიდატს, სავარაუდოდ, 8 სექტემბრის შემდეგ დაასახელებს, მაშინ, როცა სხვა პარტიები კანდიდატების დასახლებას დაასრულებენ.

თავდაპირველად პირველ არხთან ინტერვიუში, ქართული ოცნების თავმჯდომარემ, ბიძინა ივანიშვილმა განაცხადა, რომ ჰქონდა პოზიცია, საპრეზიდენტო კანდიდატი გუნდიდან არ დაესახელებინა, რასაც პრემიერ-მინისტრი, მამუკა ბახტაძეც დაეთანხმა.

გავრცელებული ინფორმაციით, მმართველმა გუნდმა შესაძლოა მხარი დამოუკიდებელ კანდიდატს სალომე ზურაბიშვილს დაუჭიროს, თუმცა როგორც ბახტაძე აცხადებს, გუნდში არსებობს პოზიცია, რომ ქართულმა ოცნებამ საპრეზიდენტო კანდიდატი აუცილებლად დააყენოს.