საქართველოს მთავარი პროკურატურის განცხადებით, წყალტუბოში პროკურორმა ფიზიკური და სიტყვიერი შეურაცხყოფა მიაყენა მოქალაქეს, რა დროსაც მან ცეცხლსასროლი იარაღიდან რამდენიმეჯერ უმისამართოდ გაისროლა. უწყების თქმით, კონფლიქტის შედეგად მოქალაქემ მიიღო სხეულის სხვადასხვა სახის დაზიანება.

უწყების განმარტებით, შემთხვევა 24 აგვისტოს მოხდა და გენერალური ინსპექცია მას უკვე იძიებს.

საქართველოს მთავარი პროკურორის 2018 წლის 27 აგვისტოს ბრძანებით, საქმეზე საბოლოო გადაწყვეტილების მიღებამდე პროკურორი გადაყენებულია დაკავებული თანამდებობიდან.

როგორ უწყებაში განმარტავენ, პროკურორის მიერ დანაშაულის ჩადენის დამტკიცების შემთხვევაში, ფაქტს მიეცემა შესაბამისი სამართლებრივი შეფასება. ამის გარდა, საქართველოს მთავარი პროკურატურის გენერალურ ინსპექციაში მიმდინარეობს სამსახურებრივი შემოწმება პროკურორისთვის შეუფერებელი საქციელის ჩადენის ფაქტზე.