ზუგდიდის რეფერალური საავადმყოფოს კლინიკური დირექტორის, სულხან ორჟონიას განცხადებით, ანაკლიის ფესტივალიდან გადაყვანილი ორი პაციენტიდან ერთ-ერთს უცნობი სუბსტანციით ინტოქსიკაციის ეფექტი ჰქონდა. როგორც ორჟონიამ ჟურნალისტებთან საუბარში აღნიშნა მესამე პაციენტი საავადმყოფოში უკვე გარდაცვლილი შეიყვანეს.

ანაკლიაში მუსიკალური ფესტივალ ECHOWAVES-დან სასწრაფო დახმარების ჯგუფებმა საავადმყოფოში სამი ახალგაზრდა გადაიყვანეს. ერთ-ერთი მათგანი სამედიცინო დაწესებულებაში მისვლამდე გარდაიცვალა.

შსს-ს განცხადებით საქმეზე გამოძიება საქართველოს სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. უწყებაში ამბობენ, რომ ფესტივალზე ნარკოდანაშაულის ბრალდებით 4 პირი დააკავეს.