ანაკლიის სანაპიროზე მიმდინარე მუსიკალურ ფესტივალ ECHOWAVES-დან, სასწრაფო დახმარების ჯგუფებმა საავადმყოფოში სამი ახალგაზრდა გადაიყვანეს. ერთ-ერთი მათგანი კი სამედიცინო დაწესებულებაში მისვლამდე გარდაიცვალა. მომხდარის შესახებ ინფორმაცია საზოგადოებრივმა მაუწყებელმა გაავრცელა.

როგორც შინაგან საქმეთა სამინისტრომ On.ge-ს განუცხადა, საქმეზე გამოძიება საქართველოს სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. შსს-ს ცნობით, საქმეზე დანიშნულია ექსპერტიზა.

Echowaves ახალი მუსიკალური ფესტივალია, რომელიც ანაკლიაში 23 აგვისტოს დაიწყო და 26 აგვისტოს დასრულდება.