რესპუბლიკური პარტიის ერთ-ერთი ლიდერი ლევან ბერძენიშნილი On.ge-სთან საუბარში, განმარტავს, რომ ლევან იზორიას განცხადება რესპუბლიკელების მიერ ოდეერების ინსტიტუტის მხარდაჭერასთან დაკავშირებით, სიმართლეს არ შეესაბამება:

"სავარაუდოდ, ბატონი იზორია გულისხმობს იმას რომ პარლამენტში ფრაქცია მხარს უჭერდა რაღაც კანონებს. რესპუბლიკურ პარტიას პარლამენტში ჰქონდა როგორც თამარ კორძაიას გამოსვლა, ისე დავით ბერძენიშვილის, სადაც კარგად იყო განმარტებული, თუ რატომ არ ვუჭერთ მხარს ოდეერების ინსტიტუტს და რას არ ვუჭერთ მხარს. ორივე გამოსვლის ნახვა ჩვენი ფეისბუკის გვერდზეა შესაძლებელი. მოკლედ, ჩვენ არ ვუჭერდით მხარს, ამიტომ ბატონი იზორია რასაც ამბობს, ეს არ შეეფერება სიმართლეს, ის არ იწყებს სიმართლით და უბრალოდ ტყუილია".

თავდაცვის მინისტრმა ლევან იზორიამ ჟურნალისტებთან საუბრისას აღნიშნა , რომ იურიდიული კომიტეტის თავმჯდომარის ვახტანგ ხმალაძის აქტიური მონაწილეობით, რესპუბლიკელები კოალიციაში ყოფნისას სახელმწიფო უსაფრთხოების სამსახურის წარმომადგენლის ინსტიტუტს მხარს უჭერდნენ:

"ყველგან აპრობირებულია, სადაც არის კრიტიკული ინფრასტრუქტურა, სადაც არის უსაფრთხოების თემები, საიდუმლოებასთან დაკავშირებული თემები, სახელმწიფო უსაფრთხოების სამსახურს ჰყავდეს წარმომადგენელი, თუმცა ხშირ შემთხვევაში ეს წარმომადგენლობა დამოკიდებულია მათ ნებაზე, სწორედ ეს ჩაიწერა კანონში მათ შორის რესპუბლიკური პარტიის აქტიური მონაწილეობით, ჩვენ ცალკე შეხვედრაც კი გვქონდა იურიდიული კომიტეტის თავმჯდომარესთან".