საგანგებო სიტუაციების მართვის სამსახურმა ყოფილი ლეოგრანდის (ამჟამად ველმონდი) სასტუმრო დალუქა. მათი ინფორმაციით, ველმონდი ორი დღის განმავლობაში 300-მდე სტუმარმა დატოვა. მათივე ცნობით, ისინი სასტუმროსთან მოლაპარაკებებს გააგრძელებენ.

საგანგებოში აცხადებენ, რომ ძირითადი რეკომენდაციების შესრულების შემდეგ მზად არიან გასცენ ნებართვა სასტუმროს შენობის ექსპლუატაციაში ხელახლა შესვლის შესახებ. უწყების ცნობით, სასტუმროსთან მოლაპარაკების პროცესში აჭარის ავტონომიური რესპუბლიკის მთავრობა და აჭარის ტურიზმის დეპარტამენტიც იყო ჩართული.

სასტუმროს ადმინისტრაცია დალუქვამდე აცხადებდა, რომ ტურისტულ სეზონზე დახურვა გამოუსწორებელი შეცდომაა და ბიზნესს დააზარალებდა.

2017 წლის 24 ნოემბრის ღამეს სასტუმრო ლეოგრანდში გაჩენილი ხანძრის შედეგად 11 ადამიანი დაიღუპა. მათ შორის, 10 საქართველოს, ხოლო ერთი ირანის მოქალაქე. მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია შეძლეს. 20-მდე ადამიანი სხვადასხვა სირთულის ინტოქსიკაციის გამო, ბათუმის კლინიკებში გადაიყვანეს.