"ჩვენი ბიჭები მაიკებს ჩაიცმევენ, თუ არ ჩაიცვამენ, ეს არავის საქმე არ არის", - ასე შეაფასა ქართველი მოჭიდავეების მიერ ჩრდილოეთ ოსეთის დეპუტატის და რუსეთის ნაკრების მთავარი მწვრთნელის, ჯაბო თადეევის სახიანი მაისურის ფოტო ფედერაციის პრეზიდენტმა, გეგა გეგეშიძემ. ამის შესახებ გეგეშიძე რუსთავი 2-ს ესაუბრა.

გეგეშიძის თქმით, სხვა ქვეყნის წარმომადგენელ სპორტსმენებსაც აცვიათ მაისური ქართველი სპორტსმენის, ვლადიმერ ხენჩიგაშვილის გამოსახულებით, მაგრამ ამაზე არავინ ლაპარაკობს. მისივე თქმით, ხალხი ჯობია იმით დაინტერესდეს რა პირობებში ვარჯიშობენ ქართველი მოჭიდავეები.

"მთელი მსოფლიო, რომ ჩვენ დროშას აქვეყნებს და ევროპის კონტინენტი, რომ ჩვენს ჰიმნს იზეპირებს უკვე, ამდენი მედალი, რომ გაკეთდა და საერთოდ ფედერაცია, რომ ესეთი წარმატებულია ვინმეს უკითხია?", - აცხადებს გეგეშიძე.

ფედერაციის პრეზიდენტი ამბობს, რომ თედეევის მტრად გამოყვანა არასწორია, რადგან ის მეგობარია და ქართველებს საოკუპაციო რეჟიმის მიერ მოკლული არჩილ ტატუნაშვილის ცხედრის გადმოსვენებაში დაეხმარა.

საქართველოს ნაკრების მთავარმა მწვრთნელმა, გიორგი იანტბელიძემ და მოჭიდავე გენო პეტრიაშვილმაც განაცხადეს, რომ თედეევი საქართველოს ნაკრების აქტიური გულშემატკივარი და მათი მეგობარია. მათივე თქმით, საქართველოს დაკარგულ ტერიტორიებზე ისევე განიცდიან, როგორც საქართველოს ყველა მოქალაქე და ბოდიშს იხდიან დაუფიქრებლობისთვის.

აღნიშნული ფოტო და ინფორმაცია თედეევის შესახებ On.ge-მ რამდენიმე საათის წინ გაავრცელა. ფოტოზე, რომელიც On.ge-ს მკითხველმა მიაწოდა საქართველოს ჭიდაობის ეროვნული ნაკრების მთავარი მწვრთნელი, გიორგი იანტბელიძე და მოჭიდავეები გენო პეტრიაშვილი, ზურაბ იაკობაშვილი და მამუკა ერაძე არიან. მათ რუსეთის დროშისფერიანი მაისურები აცვიათ, რომელზეც ჩრდილოეთ ოსეთის პარლამენტის დეპუტატისა და რუსეთის ნაკრების მთავარი მწვრთნელის, ძამბოლატ (ჯაბო) თედეევის სახეა დაბეჭდილი.

თედეევი ჩრდილოეთ ოსეთის პარლამენტში ფრაქცია რუსი პატრიოტების წარმომადგენელია. მას ოსეთის გმირისა და ქვეყნის წინაშე დამსახურებისთვის სხვადასხვა ჯილდოები აქვს მიღებული.

გაიგეთ მეტი: