დღეს, 10 აგვისტოს საქართველოს ეროვნული ვალუტა დოლართან მიმართებით 6,5 თეთრით გაუფასურდა. ეროვნული ბანკის მონაცემებით, ლარი 50-ზე მეტი ვალუტიდან მხოლოდ თურქულ ლირასთან გამყარდა.

დღის განმავლობაში ლარის გაცვლითი კურსი ხშირად იცვლებოდა, ამის მიზეზი, სავარაუდოდ, საქართველოს ყველაზე მსხვილი სავაჭრო პარტნიორებში, თურქეთსა და რუსეთში მიმდინარე მოვლენებია.

საქართველოს ორ უმსხვილეს სავაჭრო პარტნიორ ქვეყანაში, რუსეთსა და თურქეთში ადგილობრივი ვალუტა გაუფასურდა. რუსეთიდან საქართველოს იმპორტირებული პროდუქტის 13 პროცეტი შემოდის, თურქეთიდან კი - 15. რუსეთი წლების განმავლობაში, პირველ ადგილს იკავებდა ფულადი გზავნილების რაოდენობითაც. ფულადმა გზავნილებმა რუსეთიდან ბოლო თვის განმავლობაში დაახლოებით $37 მილიონი შეადგინა.

თურქული ლირა

დღევანდელი მდგომარეობით, თურქულმა ლირამ თავისი ღირებულების ისტორიულ მინიმუმს მიაღწია. 10 აგვისტოს დღის ბოლოს 1 ამერიკულის დოლარის ღირებულება 5,55 ლირადან 6,5 ლირამდე გაიზარდა. საბოლოოდ, ერთ დღეში ლირა 15 პროცენტით გაუფასურდა.

თურქული ვალუტის გაუფასურება დროში ემთხვევა ორი ქვეყნის ლიდერების, დონალდ ტრამპისა და რეჯეფ ტაეპ ერდოღანის მწვავე პოლიტიკურ განცხადებებს. მიზეზი, თურქეთში მიმდინარე სასამართლო პროცესია. თითქმის ორი წელია თურქული სასამართლო განიხილავს ამერიკის მოქალაქის ანდრიუ ბრონსონის საქმეს. თურქეთი ამერიკელ პასტორს ტერორიზმსა და ფეთჰულა გიულენის ორგანიზაციის წევრობას ედავება.

თურქული ლირას გაუფასურება ნიშნავს, რომ გაიაფდება ამ ქვეყნიდან ინპორტირებული პროდუქტი და უფრო გაიზრდება მასზე მოთხოვნა. გარდა ამისა, თურქეთიდან გაგზავნილი ლირის მყიდველუნარიანობა.

რუსული რუბლი

უკვე მესამე დღეა, რუსული რუბლი დიდი წნეხის ქვეშაა. დღეს რუბლმა 2016 წლის შემდეგ ყველაზე დაბალი მაჩვენებელი დააფიქსირა. ერთი დოლარის ღირებულებამ 67 რუბლია. მიმდინარე კვირაში რუსული რუბლი დოლართან მიმართებით დაახლოებით 7 პროცენტით გაუფასურდა. რუბლი უფასურდება ევროსთანაც.

მიმდინარე პროცესები, დიდი ალბათობით, რუსეთსა და ამერიკას შორის დაძაბული პოლიტიკური ვითარების გამოძახილია. გასულ კვირაში ცნობილი გახდა სანქციათა ახალი პაკეტის შესახებ, რომელსაც აშშ დაუწესებს რუსეთს.

ახალი სანქციათა პაკეტი, გულისხმობს რუსული ბანკების, დოლარში გამოსახული ოპერაციების გაყინვას. სულ ამ სიაში შვიდი რუსული ბანკი აღმოჩნდა.

გარდა ამ პაკეტისა, აშშ-ს სენატმა მიიღო კიდევ ერთი ამკრძალავი დოკუმენტი. ამჯერად, რუსეთს საქნციები, ბრიტანეთში სერგეი სკრიპალისა და შვილის მოწამვლის გამო დაუწესეს. სანქციები 22 აგვისტოს ამოქმედდება, რაც ნიშნავს, რომ რუბლი შესაძლოა, კიდევ გაუფასურდეს.

მზარდი გაუფასურების ფონზე, რუსეთის ცენტრალურმა ბანკმა თითქმის ორჯერ შეამცირა სავალუტო შესყიდვები.

რუბლის მკევთრი გაუფასურება მნიშვნელოვნად აისახება ქართულ ვალუტაზეც. რუსეთი საქართველოსთვის, თურქეთის შემდეგ, ყველაზე მსხვილი პარტნიორია, თუმცა რიგ სეგმენტებში ქართული ეკონომიკა უფრო მნიშვნელოვნადაა დამოკიდებული რუსეთზე ვიდრე თურქეთზე. მაგალითად, საქართველოში ტურისტების უმრავლესობა რუსეთიდან ჩამოდის.

ამავე თემაზე: