რუსეთის პრემიერ მინისტრის, დიმიტრი მედვედევის განცხადებით, თუ ამერიკის შეერთებული შტატები სანქციებს გააგრძელებს ამას ეკონომიკური ომის გამოცხადებად მიიღებენ და ყველა შესაძლო გზით უპასუხებენ:

"თუ ისინი აკრძალავენ საბანკო ოპერაციებს და რომელიმე ვალუტას, ჩვენ ამას ეკონომიკური ომის დეკლარირებად აღვიქვამთ. ჩვენ მოგვიწევს შესაბამისად რეაგირება - ეკონომიკური, პოლიტიკური და სხვა ყველა შესაძლო გზით, თუ ეს აუცილებელი იქნება. ჩვენს ამერიკელ მეგობრებს ეს არ უნდა ეშლებოდეთ", - განაცხადა მედვედევმა.

მედვედევმა ხაზი გაუსვა, რომ რუსეთს ეკონომიკური შეზღუდვების დროს გადარჩენის დიდი ისტორია აქვს და აქამდე არასდროს მოქცეულა გავლენის ქვეშ. მანვე აღნიშნა, რომ აშშ და მისი პარტნიორი ქვეყნები სანქციების დაწესებით გლობალური კონკურენციის გაქრობას ცდილობენ.

დიდ ბრიტანეთში ქიმიური იარაღის გამოყენებისთვის აშშ-მ რუსეთს ახალი სანქციები დაუწესა. საქმე ეხება სოლსბერიში ყოფილი რუსი ჯაშუშისა და მისი შვილის მკვლელობის მცდელობას. რუსეთის წინააღმდეგ დაწესებული სანქციები ძალაში შევა 22 აგვისტოდან.