ჩესტერის ზოოპარკში ვიზიტორების თვალწინ იშვიათი აღმოსავლური შავი მარტორქა დაიბადა. დედამ, 12 წლის მალინდიმ, პატარა მამრი ნახევარ საათში გააჩინა.

აღმოსავლეთაფრიკული მარტორქები ბრაკონიერების გამო გადაშენების პირას მყოფ სახეობებს მიეკუთვნებიან. მათი რქები ტრადიციულ აზიურ მედიცინაში წამლების ერთ-ერთი ინგრედიენტია.

ფოტო: Chester zoo

მსოფლიოში აღმოსავლური შავი მარტორქის 650 წარმომადგენელიღაა დარჩენილი.

ჩესტერის ზოოპარკის ძუძუმწოვართა კურატორი, ტიმ როულენდი ამბობს, რომ ეს კიდევ ერთი წარმატებაა იშვიათი სახეობების შენარჩუნების საქმეში.

"ზოოპარკებში ჯანსაღი, მზარდი პოპულაციის არსებობა არა მხოლოდ ჩესტერისთვის, არამედ მთელი მსოფლიოსთვის მნიშვნელოვანია", - აღნიშნავს როულენდი.