ისლანდიის პრემიერ-მინისტრი, დავიდ გუნლაუგსონი, ისლანდიურ ტელეარხთან, სტიოდ 2-თან ექსკლუზიურ ინტერვიუში აცხადებს, რომ გადადგომას არ აპირებს.

დოკუმენტებით ირკვევა, რომ 2007 წელს გუნლაუგსონმა შეიძინა ოფშორული კომპანია Wintris. 2009 წელს პარლამენტში მოსვლისას მან არ დაადეკლარირა ეს კომპანია და თავისი წილი მეუღლეს $1-ად მიჰყიდა.

კომპანია, რომელიც პრემიერს და მის მეუღლეს ეკუთვნის, სამი ისლანდიური უმსხვილესი ბანკის ქონებიდან 4 მილიონამდე ფუნტის მფლობელობაზე აცხადებს პრეტენზიას. 2008 წლის ეკონომიკური კრიზისის დროს სამივე ბანკი გაკოტრდა, რამაც ისლანდიის მდგომარეობა კიდევ უფრო დაამძიმა და ქვეყანა ჯერ კიდევ არ გამოსულა კრიზისიდან.

2013 წელს გუნლაუგსონი ისლანდიის პრემიერ მინისტრი გახდა, რის შემდეგაც გაკოტრებული ბანკების კრედიტორებთან მოლაპარაკება დაიწყო, რაც აშკარა ინტერესთა კონფლიქტია.

დოკუმენტების გამოქვეყნების შემდეგ, პრემიერ მინისტრის გადადგომის მოთხოვნით ონლაინ პეტიცია გამოქვეყნდა, რომელსაც 16 ათასზე მეტმა ადამიანმა მოაწერა ხელი, ასევე დაგეგმილია საპროტესტო აქციები. გუნლაუგსონისთვის უნდობლობის გამოცხადებისთვის ხმის მიცემას გეგმავს ისლანდიის პარლამენტიც.

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.