შვილმკვდარი მამები მალხაზ მაჩალიკაშვილი და ზაზა სარალიძე და ჟურნალისტი ელისო კილაძე სტრასბურგში აღარ მიემგზავრებიან. როგორც მათ რუსთავი 2-ის ეთერში განაცხადეს ფრენა გერმანიის მიმართულებით დღეს, 4 აგვისტოს ჰქონდათ დაგეგმილი, თუმცა ჩაიშალა.

ჟურნალისტმა ელისო კილაძემ რუსთავი 2-ის ეთერში აღნიშნა, რომ სტრასბურგში მათთან ერთად მიემგზავრებოდა პაატა აბჟანდაძე, რომელიც ორგანიზაცია ემიგრანტები ახალი საქართველოსთვის ხელმძღვანელია. კილაძის თქმით, გამზგზავრებაზე უარი აბჟანდაძისგან მიღებული ინფორმაციის შემდეგ თქვეს.

"მას დაუსვეს კითხვები, რა შეხება აქვს ისლამთან, იცნობს თუ არა მალხაზ მაჩალიკაშვილს და იცის თუ არა, რომ ერთ-ერთი პირი ჩვენს შორის და სავარაუდოდ, პირდაპირ უთხრეს მას გვარი, მალხაზ მაჩალიკაშვილი არის ტერორიზმში ეჭვმიტანილი პირი და ფაქტობრივად, ჩვენ ბრალი დაგვდეს ის, რომ ეს ეჭვმიტანილი პირი შეგვყავდა გერმანიის ტერიტორიაზე", - თქვა კილაძემ.

მალხაზ მაჩალიკაშვილმა აღნიშნა, რომ მისი დაკავება უნდოდათ, ზაზა სარალიძის თქმით კი, ეს ხელისუფლების უმეცარი ნაბიჯია.

განახლება: სუს-ში On.ge-ს მასალის გასვლიდან ორი დღის შემდეგ განუცხადეს, რომ მაჩალიკაშვილის შესახებ ინფორმაცია მათ არ გაუგზავნიათ.