თუკი რამდენიმე წლის წინ ჯერ კიდევ ქლაბერი იყავი და ღამღამობით თბილისის კლუბებად წოდებულ დაწესებულებებში დაეხეტებოდით, ეს სიმღერები აუცილებლად გექნება მოსმენილი მაგრამ ალბათ წლებია აღარ გაგხსენებიათ. ეს ის პერიოდია, ელექტრონულ მუსიკას ფეხი ჯერ რომ არ ჰქონდა მოკიდებული და კლუბებში "საცეკვაოებს" უკრავდნენ.

ზოგიერთ მათგანს თავისი ნებით არც კი ჩართავს ვინმე, მხოლოდ უნებლიედ შეიძლება მოესმინა, მაგრამ გარკვეული ასოციაციები და მოგონებები მაინც გექნებათ.

"უი, ამ "ვეშით" რომ ტვინს ბურღავდნენ გახსოვთ?" - ასე მაინც გემახსოვრებათ.

1. Gym Class Heroes, “Cupid’s Chokehold” ft. Patrick Stump

იყო დრო, ეს სიმღერა მრავალი თბილისელის მანქანაში ისმოდა, მაგრამ წლებია ამ ქალაქს მსგავსი ჰანგები აღარ მოუსმენია. გაიხსენეთ, იქნებ თქვენც იქნევდით თავს ამ სიმღერაზე?

2. Kevin Rudolf - Let It Rock ft. Lil Wayne

ქალაქში ბოროტი ხმები დადის, რომ ამ სიმღერას ჯერ კიდევ უსმენენ. თქვენ გადაწყვიტეთ სიმართლეა თუ არა, მაგრამ არ უარყოთ, ერთ დროს თქვენც სიამოვნებით ჰყვებოდით "ლილ წაყნეს" რაღაცნაირ ხმას.

3. Damian Marley - Welcome To Jamrock

გინახავთ, 1994 წლის BMW-თი მოძრავი, ქართველი, სველ „პლატოკიანი“ ბაბულიკი? თუ კი, მაშინ დამეთანხმებით, რომ მათი მანქანიდან ყოველთვის ისმოდა დემიენ მარლის ჰანგები.

4. Duffy - Mercy

„მერსი, მერსი, მერსი - იე, იე იე!!!“ - მესმოდა ხოლმე ჩემი კლასელი გოგონებისგან. ვფიცავ, ვინმემ 2009 წლის თბილისზე ფილმის გადაღება რომ მთხოვოს ახალგაზრდა შეყვარებულ წყვილებზე, ამ სიმღერას აუცილებლად გამოვიყენებ საუნდტრეკად.

5. Paris Hilton - Stars Are Blind

წყეულიმც იყოს ყველა ის ვი-ჯეი, რომელიც პირველი სტერეოს ეთერში ამ სიმღერას გაუჩერებლად ატრიალებდა. ვხუმრობ, ჯანმრთელად და ბედნიერად იყვნენ, მაგრამ ჩვენს დამახინჯებულ ახალგაზრდობას რა პასუხს გასცემენ?!

პ.ს : ყველაზე საინტერესო ამ სიმღერის შესახებ ისაა, რომ ამ ყრუ ბგერებმა პერიზ ჰილტონის სასიმღერო კარიერა კუდიგორის გზას გაუყოლა.

6. Justin Bieber - One time

ხომ არ გეგონათ რომ დამავიწყდებოდა? რა დამავიწყებს, ჩემი კლასელი გოგო ამ სიმღერის მოსმენის შემდეგ რამდენიმე თვე (ან წელი) ამბობდა, რომ თავის შვილს ჯასტინ ბიბერს არქმევდა. გაიზარდა და დაჭკვიანდა, თორემ ახლა გვეყოლებოდა მოქალაქე ჯასტინ ბიბერ [...] (წერტილების ადგილას ნებისმიერი ქართული გვარი ჩასვით).

ნუ გარბიხართ საიტიდან! სიმართლეს თვალში ჩახედეთ! ბევრი თქვენგანი უსმენდა ამ სიმღერას!

7. High School Musical - We’re All In This Together

ჰეჰ, არ თქვათ არაო. არ მჯერა !!! იმ დროინდელი თინეიჯერები უკლებლივ ყველა, განსაკუთრებით გოგონები, ყველანი უყურებდით ამ ფილმს და ამ სიმღერაზეც ცეკვავდით ზუსტად ისე, როგორც ვიდეოშია.

ვაღიარებ.

თქვენ თუ ზაკ ეფრონი გიყვარდეთ…

მე ვანესას ვეტრფოდი ;(

8. Camp Rock - Gotta Find You

2008 წელს ჩემი შეყვარებული ამ სიმღერას მასმენინებდა (შესაძლოა ამიტომაც დავშორდით). როგორც გავარკვიე, იმ დროს ყველა შეყვარებული ახლად გათინეიჯერებული გოგონა ამ სიმღერით და ზოგადად Camp Rock-ითა და ძმები ჯონასებით იყო შეპყრობილი.

თავს ტყუილად ნუ მოიკატუნებთ, თქვენც… და ხშირად იმეორეთ This is Me.

9. Outlandish - Callin U

„ამ ქოლინგ იუ, ვიზოუმაგოზმავერი სოლინფოლინგტუ“ - ამ ოქროს სიტყვების ავთენტურობაში ეჭვი არასდროს შემიტანია, არც დღეს შემაქვს. ჩვენი თინეიჯერობის სიმღერაა და როგორც ვისწავლეთ, ისე ვმღერით, ენი პრობლემს?

თქვენც ასე მღეროდით, სანამ ინგლისურს ისწავლიდით.

„ოუ ნოუ ნოუ... “ - იეპ!

10. Madcon - Beggin

ბოლოს კლასიკით რომ არ დამესრულებინა, არ შემეძლო… 2007-08, რო არ მოგატყუოთ 2009 წელია და ბათუმის სანაპიროზე ვწევააარ… ხოოდა, ისმის „ბეგიიინ, ბეგიიინ იუუუ“, ყველა მხრიდან - მარჯვნიდან, მარცხნიდან, წინიდან, უკნიდან, ზემოდან, ქვემოდან. ყველგან ეს სიმღერა იყო, მათ შორის თქვენს ტელეფონებში და დიიიიდ, უზარმაზარ დისკიან პლეიერებშიც.

ნაძლევს ვდებ, ახლაც კი აგეცეკვათ.

ჯერ ამ სიმღერებს მოუსმინეთ, გაიხსენეთ თინეიჯერობა და გაგრძელებაც მალე იქნება.