ხორავას ქუჩის საქმის დროებითი საგამოძიებო კომისიის წევრი ოთო კახიძე განმარტავს თუ რატომ გაგრძელდა 5 წუთზე ნაკლები იუსტიციის მინისტრის დაკითხვა და ამბობს, რომ ორი კითხვა დაისვა, საქმიანად - როგორც სამართლებრივი, ისე პოლიტიკური და მორჩა:

"მისთვის დიდი დრო არ წაგვირთმევია და არც პოლიტიკურ იწილო-ბიწილოში შევსულვართ".

ოთო კახიძის განმარტებით, თეა წულუკიანი დასაკითხ პირთა სიაში იყო საზოგადოების ნაწილის, მათ შორის დაზარალებულის ინტერესიდან გამომდინარე:

"ის მეგობრობს სუბელიანის ნათესავთან, სოზარ სუბართან. ამიტომ ლეგიტიმურად გასარკვევი იყო და არის მისი ნაცნობობის საკითხი მირზა სუბელიანთანაც. ეს სამართლებრივი მხარე. რაც შეეხება მისი, როგორც მინისტრის პოლიტიკურ პასუხისმგებლობას, აღნიშნულის შესაფასებლად მოვიხმეთ წულუკიანის 31 მაისის განცხადება, კომისიის მუშაობის დაწყებამდე და ახლა, როცა კომისიამ არაერთი ფუნდამენტური პრობლემა გამოკვეთა პროკურატურის მუშაობაში".

დღეს, 3 აგვისტოს ხორავას ქუჩის საქმის საგამოძიებო კომისიის სხდომაზე იუსტიციის მინისტრის, თეა წულუკიანის გამოკითხვა ოთხი წუთი გაგრძელდა. წულუკიანს მხოლოდ სამი კითხვა დაუსვა ევროპული საქართველოს წევრმა, ოთო კახიძემ.

იუსტიციის მინისტრმა, თეა წულუკიანმა საგამოძიებო კომისიის დატოვების შემდეგ, ჟურნალისტებთან საუბრისას თქვა, რომ არ ელოდა, თუ მხოლოდ რამდენიმე წუთს გაგრძელდებოდა მისი გამოკითხვა. წულუკიანმა საგამოძიებო კომისიის მნიშვნელობა შეაფასა და ხორავას ქუჩის საქმეში დაზარალებულ მშობლებს უთხრა, რომ პროკურატურა, სასამართლო, გამოძიება ბოლომდე სიმართლის მხარეს იყო.