"ბევრი საკითხი გადაიჭრა და ბევრიც ვერა, სამწუხაროდ, თუმცა შეიძლებოდა გადაჭრა", - ასე შეაფასა პრემიერ-მინისტრის მრჩეველმა, სოზარ სუბარმა ჭუბერსა და ხაიშში მიმდინარე მოვლენები. იმედის ეთერში საუბრისას სუბარმა აღნიშნა, რომ ხაიშის ტერიტორიაზე შეუძლებელია კანონიერად აწარმოო საქმიანობა, რადგან აღნიშნული ტერიტორია მიხეილ სააკაშვილმა ინდურ კომპანიას მიყიდა.

სუბარი ოპოზიციის გარდა მოქმედი მთავრობის პასუხისმგებლობაზეც საუბრობს და ამბობს, რომ ამ წლების განმავლობაში მოსახლეობის პრობლემების გადასაჭრელად არასკამარისი ნაბიჯები გადაიდგა.

"აქ არ არის მხოლოდ სახელმწიფოს მხარეს პასუხისმგებლობა, აქ არის მოსახლეობის ნაწილის მხარესაც პასუხისმგებლობა. არის ადამიანების კატეგორია, რომელთაც ყოველთვის ურჩევნიათ, კანონის გვერდის ავლით იმოქმედოს", - განაცხადა სუბარმა.

26 ივლისს ჭუბერსა და ხაიშში, ფინანსთა სამინისტროს საგამოძიებო მოქმედებებს დაპირისპირება მოყვა. უწყებაში განაცხადეს, რომ სვანეთში ხე-ტყის გადამამუშავებელი და ხის მასალის რეალიზატორი საწარმოების საქმიანობის კანონიერებას ამოწმებდნენ. ადგილობრივებმა სამართალდამცავებს პირადი საკუთრების ჩხრეკის უფლება არ მისცეს.

მოგვიანებით სვანეთში სპეცდანიშნულების რაზმები გამოჩნდა. ადგილობრივებმა სპეცრაზმს ხელკეტები და ქვები დაუშინეს და გზა გადაკეტეს. მათ განაცხადეს, რომ სვანეთში ტყის ჭრის გარდა სხვა სახის შემოსავალი არ არსებობს.

მთავრობის წარმომადგენლებთან მოლაპარაკებების შემდეგ გადაკეტილი გზა გაიხსნა. სოზარ სუბარმა განაცხადა, რომ მთავრობის წარმომადგენლები ერთი კვირის განმავლობაში სვანეთში ჩავლენ ადგილობრივების პრობლემებზე სასაუბროდ. მისივე თქმით, მთავრობა იმუშავებს იმაზე, რომ ადგილობრივებს ალტერნატიული შემოსავლის წყარო ჰქონდეს.