"ოდესმე ამოგიჭრიათ გლანდები, ან აპენდიქსი, იგივე ბრმა ნაწლავი? თუ კი, და ამასთანავე ხართ ქალი, მაშინ, ალბათ, თქვენთვის არასოდეს არავის უთქვამს, რომ ეს ოპერაციები თქვენი შვილოსნობის შანსს გაზრდიდა", - CNN 15 წლიანი კვლევის შედეგების შესახებ წერს, რომლის მიხედვით, ქალებს, რომლებმაც ახალგაზრდობაში აპენდიქსის, ან ნუშურა ჯირკვლების (გლანდების) ოპერაცია გაიკეთეს, დაორსულების მეტი შანსი აქვთ.

კვლევამ ბოლომდე ვერ ამოხსნა კავშირი ოპერაციებსა და დაორსულებას შორის, თუმცა დანდის უნივერსიტეტის მკვლევარებმა დიდი ბრიტანეთის მასშტაბით 530 000 ქალის სამედიცინო ისტორია შეისწავლეს. მათ აღმოაჩინეს, რომ იმ ქალებს შორის, რომლებსაც გაკეთებული ჰქონდათ აპენდიქსისა და ნუშურა ჯირკვლების ოპერაცია, ფეხმძიმობის მაჩვენებელი მაღალი იყო და კიდევ უფრო მეტი იყო მათი რაოდენობა, თუკი ორივე მათგანი [აპენდიქსი და ნუშურა ჯირკვლები] ჰქონდათ ამოჭრილი.

აპენდიქსის ან ნუშურა ჯირკვლების გარეშე, ფეხმძიმე ქალების მაჩვენებელი 54% და 53% იყო, ხოლო, იმ ქალების, რომლებსაც არცერთი აღარ ჰქონდათ - 59%.

შედეგები ეწინააღმდეგება ძველ სამედიცინო თეორიებს, რომ ოპერაციები, განსაკუთრებით აპენდექტომია, შვილოსნობის შანსს ამცირებს, რადგან საშვილოსნოს მილების გარშემო ქსოვილი ნაწიბურების ფორმირებას განიცდის.

კონსულტანტი, ქირურგი და მკვლევარი სამი შიმი ამბობს, რომ ამ კვლევამ ეჭვქვეშ დააყენა მითი აპენდექტომიის მავნე ზეგავლენის შესახებ. მისივე თქმით, ახალგაზრდა ქალებს არ უნდა ეშინოდეთ იმის, რომ ამ ოპერაციების გამო შვილოსნობის შანსები შეუმცირდებათ.

შედეგების გაგებიდან მომდევნო ეტაპზე მკვლევარებს სურთ გაიგონ, თუ რატომ იზრდება ფეხმძიმობის შანსები აღნიშნული ოპერაციების შემდეგ. მათი თქმით, საჭიროა მექანიზმის პოვნა. ექიმი შიმი ამბობს, რომ ბიოლოგიური მიზეზი შესაძლოა იყოს სხეულში მიმდინარე ანთებითი პროცესი, რომელიც აპენდიქსის, ან გლანდების ანთებითაა მუდმივად გამოწვეული. იგი სხეულს დამატებით ტვირთავს, ასუსტებს და კვერცხუჯრედის განაყოფიერების შანსს პოტენციურად ამცირებს.

მკვლევარების აზრით, ამ კონკრეტული კვლევის შედეგებმა უნდა დაარწმუნოს ქალები, რომ გაიკეთონ ოპერაცია თუ ნამდვილად სჭირდებათ, თუმცა იგი არ უნდა გააკეთონ იმ მიზეზით, რომ ნაყოფიერება გაიუმჯობესონ:

"აქ მთავარია ის, რომ თუკი ნამდვილად სჭირდებათ რომელიმე ოპერაცია, ეს მათ სამომავლო ფეხმძმობის შანსებს ნამდვილად არ შეუმცირებს".