საქართველოს თავდაცვის ახალი მინისტრი, ლევან იზორია, რომელიც დღემდე სახელმწიფო უსაფრთხოების სამსახურის მოადგილე იყო, მიიჩნევს, რომ სუს–ის მიმართ საზოგადოებაში არსებობს ნეგატიური, "ბოლშევიკური" სტერეოტიპი, რაც უნდა შეიცვალოს. ამის შესახებ იზორიამ მაესტროს ფაქტორის ეთერში, დღეს განაცხადა.

იზორიამ პარალელი გაავლო ამერიკის შეერთებულ შტატებთან, სადაც მისი თქმით, სახელმწიფო უსაფრთხოების სამსახურების მუშაობა დაკავშირებულია ძალიან დიდ პატივისცემასთან და მოკრძალებულ დამოკიდებულებასთან როგორც საზოგადოების მხრიდან, ისე პოლიტიკოსებიდან იმიტომ, რომ სწორედ მათზეა დამოკიდებული, რომ ქვეყანაში იყოს უსაფრთხოება უზრუნველყოფილი:

"აქ სხვა მიდგომები და სხვა კულტურა უნდა ჩამოვაყალიბოთ. ის სტერეოტიპები, სიტყვამაც კი გაიჟღერა, "ბოლშევიკური" სწორედ ის არის, რომ ასეთი სტრუქტურებიდან თანამშრომლებს მხოლოდ ნეგატივით აღიქვამენ. არადა, ქვეყანა რომ უსაფრთხოდაა, არ ხდება ტერორისტული აქტები, სწორედ სახელმწიფო უსაფრთხოების სამსახურში მყოფი ბიჭების დიდი დამსახურებაა, ასევე მისი ხელმძღვანელის, ამიტომ უნდა დავუფასოთ ეს შრომა ამ ადამიანებს. აქედან მოსული ყველა არის ცუდი, ეს სტეროტიპი მართლაც ბოლშევიკურია და უნდა დავანგრიოთ".

თავდაცვის ახალი მინისტრის პასუხი ეხებოდა მისი წინამორბედის, თინა ხიდაშელის დღევანდელ განცხადებას. ხიდაშელმა განაცხადა, რომ მის შემცვლელად იზორიას დანიშვნა ძალიან ცუდი გზავნილი იქნება დასავლელი პარტნიორებისთვის, რადგან უშიშროების კადრი მივიდა თავდაცვის უწყებაში.

ლევან იზორიამ თავად თინა ხიდაშელის განცხადება არ შეაფასა. მისი თქმით, ის არ აპირებს წინამორბედებზე ნეგატიურ საუბარს.