სამოქალაქო ავიაციის სააგენტოს მონაცემებით, გასული წლის 6 თვესთან შედარებით, აეროპორტებში მგზავრთა ნაკადი 30,79%-ით, ხოლო 2016 წლის ანალოგიურ პერიოდთან შედარებით 94,23%-ით გაიზარდა.

სააგენტოს სტატისტიკის მიხედვით, მიმდინარე წლის 6 თვის განმავლობაში, საქართველოს აეროპორტები ჯამში 2 103 149 მგზავრს მოემსახურა.

ავიაციის სააგენტოს მონაცემებით:

  • თბილისის აეროპორტი 1 675 058 მგზავრს მოემსახურა, რაც 30,13%-ით (387 830 მგზავრით) მეტია, გასული წლის 6 თვის მონაცემებთან შედარებით;
  • ბათუმის საერთაშორისო აეროპორტით 190 279 მგზავრი გადაადგილდა, რაც 42,62%-ით (56 861 მგზავრით) მეტია წინა წლის ანალოგიურ მაჩვენებელზე (133 418 მგზავრი);
  • ქუთაისის საერთაშორისო აეროპორტში მგზავრთა ნაკადი 27,81%-ით გაიზარდა, რაც 51 091 მგზავრით მეტია, ვიდრე 2017 წლის პირველი ექვსი თვის განმავლობაში.

სააგენტოს ცნობით, მიმდინარე წლის 6 თვეში, საქართველოს აეროპორტებში 1 952-ით მეტი რეისი განხორციელდა და 10,93%-ით იმატა საქართველოს საჰაერო სივრცის გამოყენების მაჩვენებელმა.

2018 წლის პირველი 6 თვის მონაცემებით, პირველად ბოლო რამდენიმე წლის განმავლობაში ქართულმა ავიაკომპანიამ უცხოურ ავიაკომპანიაზე მეტი მგზავრი გადაიყვანა. რეგულარული რეისებით გადაყვანილი მგზავრების რაოდენობის/პროცენტული წილის მიხედვით პირველი ხუთეული ასე გამოიყურება:

  • Georgian Airways – 247 485 მგზავრი 12%;
  • Turkish Airlines – 246 021 მგზავრი 12%;
  • Wizz Air – 223 364 მგზავრი 11%;
  • Fly Dubai – 110 757 მგზავრი 5%;
  • Ukraine International Airlines – 109 529 მგზავრი 5%.