საქართველოს პრეზიდენტმა, გიორგი მარგველაშვილმა დღეს, 12 ივლისს ბრიუსელში მიმდინარე ნატოს სამიტზე, ჟურნალისტებთან შეხვედრისას ყოფილი პრემიერ-მინისტრის, გიორგი კვირიკაშვილის თანამდებობიდან წასვლაზე ისაუბრა:

"შეკითხვები პრემიერის ცვლილებასთან დაკავშირებით, პარტნიორებს კი არა საქართველოს რიგით მოქალაქეებს აქვთ. რატომ წავიდა თანამდებობიდან კვირიკაშვილი? არამარტო ახსნა არ ვიცით, არამედ ის არ ვიცით რატომ არ გვიხსნიან? რატომ არ ვართ ღირსი რომ გავიგოთ?"

მარგველაშვილის თქმით, ისე გამოჩნდა, თითქოს ეკონომიკური პრობლემების გამო წავიდა პრემიერი:

"მაისში გვქონია იმხელა ეკონომიკური ზრდა, რომელიც საქართველოს აქამდე არ ჰქონია. რატომ გაქრა პოლიტიკური ველიდან კვირიკაშვილი? შემდგომ რატომ გაქრა პოლიტსაბჭოდან და ფაქტობრივად, სახელმძღვანელოებიდან მისი ფოტოს ამოჭრა რატომ ხდება? რა დააშავა ამ ადამიანმა? - ეს კითხვა პარტნიორებს კი არა, ეს კითხვა აქვთ ნებისმიერ ქართულ ოჯახში, სადაც შედიხარ. აღარ გეკითხებიან, გვეშველება თუ არა რამე, გეკითხებიან - კვირიკაშვილი რატომ წავიდა. მე ეს პასუხი არ მაქვს".