შინაგან საქმეთა სამინისტროს განცხადებით, ზვიად დევდარიანის საქმესთან დაკავშირებით სავარაუდო მსხვერპლი ქალები უკვე დაადგინეს. როგორც შს მინისტრის მოადგილემ, ნათია მეზვრიშვილმა თქვა, საქმეზე ინფორმაციის მქონე პირებმა გამოძიებასთან არ ითანამშრომლეს, მაგრამ სავარაუდო მსხვერპლების ვინაობის დადგენა მაინც მოხერხდა.

მისივე თქმით, გამოძიების ფარგლებში გამოკითხული და დაკითხულია 21 პირი, ხოლო 10-მდე პირმა გამოძიებას მიაწოდა ინფორმაცია მათ მიმართ განხორციელებული შესაძლო ადევნების, სექსუალური შევიწროებისა და სისხლის სამართლის კოდექსით გათვალისწინებული სხვა დანაშაულის შესახებ.

მეზვრიშვილმა განმარტა, გამოსაკითხია რამდენიმე პირი, რომლებსაც თავად ზვიად დევდარიანი ასახელებს, რის შემდეგაც მიღებული იქნება საქმეზე შემაჯამებელი გადაწყვეტილება.

ზვიად დევდარიანის საქმე

17 მარტს ქალთა მოძრაობამ ომბუდსმენის მიერ წარდგენილი სამეურვეო საბჭოს კონკურსის ერთ-ერთი მონაწილე და სიდას ყოფილი დირექტორი ზვიად დევდარიანი სექსუალურ შევიწროების 10-მდე შემთხვევაში დაადანაშაულა, რის შემდეგაც დევდარიანმა საკუთარი კანდიდატურა მოხსნა. საქმეზე გამოძიება შსს-მ ადევნების მუხლით დაიწყო.

ამის შემდეგ დევდარიანმა პატივისა და ღირსების შელახვისთვის სასამართლოს მიმართა და 11 პირს უჩივლა. დევდარიანის ადვოკატმა, დიმიტრი გაბუნიამ განაცხადა, რომ 11 პირიდან მხოლოდ რვა პირის ვინაობას დაასახელებენ, ხოლო მისი თქმით, სავარაუდო მსხვერპლების ვინაობას არ გაამხელენ.

ზვიად დევდარიანმა უჩივლა:

  • ბაია პატარაიას - კავშირ საფარის ხელმძღვანელი;
  • იდა ბახტურიძეს - ქალთა მოძრაობის წევრი;
  • თამარ ჩერგოლეიშვილს - ონლაინგამოცემა ტაბულას დირექტორი;
  • ნინო დანელიას - ილიაუნის პროფესორი;
  • თამარ ყურაშვილს;
  • თამარ კაკაბაძეს - ევროპული საქართველოს წევრი;
  • ეკატერინე ონიანს;
  • გამოცემა ტაბულას.

გაბუნიას განმარტებით, მოწმის სახით და არა მოპასუხედ დაიკითხება საზოგადოებრივი მაუწყებლის სამეურვეო საბჭოს წევრი ნინია კაკაბაძე.

გაიგეთ მეტი: