NDI-ის კვლევის შედეგებს, რომლის მიხედვითაც გადაწყვეტილი ამომრჩევლის მინიმალური რაოდენობა ასახელებს თავს ახალი პოლიტიკური ცენტრი გირჩის მხარდამჭერად, პარტიის ლიდერი ზურაბ ჯაფარიძე ნდობას უცხადებს.

ჯაფარიძე მიიჩნევს, რომ კვლევაში მთავარი ის ტენდენციებია, რომელიც არსებულ, ძველ პოლიტიკურ ძალებს გირჩთან შედარებით არასახარბიელო მდგომარეობაში აყენებს.

"NDI-ის კვლევის შედეგების მიხედვით, აშკარაა, რომ დღევანდელი სახელისუფლებო და წინა სახელისუფლებო პარტიის რეიტინგი გაყინულია და წინ არ მიდის. ჩანს, რომ მოსახლეობის დიდ ნაწილს არ მოსწონს ის რაც ხდება, ამიტომ გვაქვს გადაუწყვეტელ ამომრჩეველთა ძალიან მაღალი პროცენტული მაჩვენებელი [NDI: გამოკითხულთა 57%-ს გადაწყვეტილი არ აქვს, თუ ვის მისცემს ხმას არჩევნებში] ელოდება სიახლეს და მათ ყველაზე მეტად აინტერესებთ ეკონომიკური საკითხები".

გირჩის ლიდერის თქმით, პარტია 1 კვირაში აქტიურ პოლიტიკურ კამპანიასა და მოსახლეობასთან შეხვედერებს დაიწყებს:

"ჩვენ ვართ ის ძალა, რომელიც საზოგადოებას სთავაზობს სიახლეს და კომპეტენციას ეკონომიკაში, სწორედ ესაა მოქალაქეების მთავარი მოთხოვნა".

ზურაბ ჯაფარიძის თქმით, გირჩის მთავარი მიზანია 2 თვის განმავლობაში რაც შეიძლება მეტ მოქალაქემდე მოასწროს პარტიამ თავისი გზავნილების მიტანა. ის მიიჩნევს, რომ გირჩი ერთადერთი პარტიაა, რომელსაც ქვეყნის სწრაფი წინსვლა შეუძლია.

ახალი პოლიტიკური ცენტრის ლიდერი მიიჩნევს, რომ ქართული ოცნებისა და ნაციონალური მოძრაობის რეიტინგი გაყინულია, რაც ხელსაყრელია გირჩისთვის:

"ათას რაღაცას აკეთებენ, თუმცა ამომრჩეველს დაკარგული აქვს მათი ნდობა. NDI-ის კვლევებში მოცემული მაჩვენებელი არასახარბიელოა არსებული, ძველი პოლიტიკური ძალებისთვის და ხელსაყრელია ახალი პოლიტიკური პარტიისთვის, როგორიც ვართ ჩვენ".

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.