საქართველოს სახალხო დამცველის, ნინო ლომჯარიას თქმით, ზაზა სარალიძის შსს-სთან შეხვედრაზე მიიღეს იმის გადაწყვეტილება, რომ კალანდიასთვის ბრალის წარდგენაზე მოლაპარაკება პროკურატურასთან გამართონ.

სახალხო დამცველი, ასევე, ამბობს, რომ იგი კვირის ბოლომდე პროკურატურასთან სამუშაო შეხვედრის მოწყობაში ჩაერთვება:

"შინაგან საქმეთა სამინისტროს პოზიცია იყო ის, რომ ბრალის წარდგენასთან დაკავშირებით გადაწყვეტილებას იღებს პროკურატურა. ყველა მხარემ- ადვოკატმა, მეც, შსს-მაც გამოხატა მზადყოფნა პროკურატურასთან შეხვედრის და ალბათ უახლოეს პერიოდში მოხდება დაორგანიზება, თუ მათი მხრიდანაც იქნება სურვილი".

ზაზა სარალიძემ შინაგან საქმეთა სამინისტროსთან პროტესტი 2 ივნისს დაიწყო. ის ხორავას ქუჩის საქმეში არსებული პირის, მიხეილ კალანდიას დაკავებას მოითხოვდა. მან მთელი ღამე სამინისტროს ეზოში გაატარა.

შინაგან საქმეთა სამინისტროში შეხვედრის დასრულების შემდეგ ზაზა სარალიძემ კვირის ბოლომდე პროტესტი შეწყვიტა. მისი თქმით, სამინსიტროში პირობა და გარანტია მისცეს, რომ კვირის ბოლომდე რადიკალურ ნაბიჯებს გადადგამენ.