შინაგან საქმეთა სამინისტროში შეხვედრის დასრულების შემდეგ ზაზა სარალიძემ უწყების ტერიტორია დატოვა. სარალიძის განცხადებით, კვირის ბოლომდე პროტესტს წყვეტს.

მისი თქმით, სამინსიტროში პირობა და გარანტია მისცეს, რომ კვირის ბოლომდე რადიკალურ ნაბიჯებს გადადგამენ. სარალიძე არ აკონკრეტებს რა იგულისხმება რადიკალურ ნაბიჯებში, თუმცა მისი თქმით, შეხვედრით კმაყოფილია.

სარალიძის თქმით, შეხვედრას მინისტრი, გიორგი გახარია არ ესწრებოდა და მის მოადგილეს და სხვა მაღალჩინოსნებს შეხვდა.

სარალიძე შსს-ს ეზოში გუშინ, 2 ივლისს მას შემდეგ დარჩა, რაც კრიმინალური პოლიციის ხელმძღვანელს შეხვდა. სარალიძე მოითხოვს, რომ დააკავონ მიხეილ კალანდია, რომელსაც მისი შვილის მკვლელად მიიჩნევს. სარალიძემ ღამე შსს-ს ეზოში გაატარა.

მიხეილ კალანდიას მიმართ სისხლისსამართლებრივი დევნის დაწყებაზე პარლამენტის საგამოძიებო კომისიამ რეკომენდაცია გასცა. შსს-მ კი განაცხადა, რომ კომისია საკუთარ უფლებამოსილებას გასცდა.