შინაგან საქმეთა სამინისტროს განცხადებით, ახალი გუდაურის შესასვლელთან მდებარე ავტოსადგომის ტერიტორიაზე სატრანსპორტო საშუალების - ე.წ. მუხლუხა ტვირთამწის დემონტაჟის დროს, ამწეს დეტალი მოსწყდა და ერთ-ერთ მუშას დაეცა. უწყების ცნობით, იგი მიღებული დაზიანებების შედეგად, ადგილზე გარდაიცვალა. შემთხვევა დღეს, 28 ივნისს, საღამოს მოხდა.

მომხდარზე გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების ნორმების დარღვევას გულისხმობს.

ამ დროისთვის, შინაგან საქმეთა სამინისტროს მცხეთა-მთიანეთის პოლიციის დეპარტამენტის თანამშრომლები შემთხვევის ადგილზე შესაბამის საგამოძიებო მოქმედებებს ატარებენ.