დღეს ლიგამუსში "საუკეთესო ქართული რომანის" პრემიის მფლობელები გამოვლინდნენ. 2016-2017 წლის საუკეთესო რომანისთვის ჯილდო ერთდროულად ორ წიგნს, ზურა ჯიშკარიანის "საღეჭ განთიადებსა" და ლაშა ბუღაძის "პატარა ქვეყანას" ერგო. კონკურსს საქართველოში ყველაზე დიდი საპრიზო თანხა, 10 000 ლარი აქვს, რომელიც გამარჯვებულებზე გაიყოფა.

ილიაუნის ლიტერატურულ კონკურსზე წელს 20 ქართული რომანი იყო წარმოდგენილი. საუკეთესო ქართული რომანი ილიაუნის ლიტერატურული კონკურსის ჟიურიმ გამოავლინა, რომლის შემადგენლობაში ილიას სახელმწიფო უნივერსიტეტის პროფესორები და სტუდენტები შედიოდნენ.

ილიაუნის ლიტერატურულ კონკურსს რვაწლიანი ისტორია აქვს. 2010 წელს ილიას სახელმწიფო უნივერსიტეტის აკადემიურმა საბჭომ მიიღო გადაწყვეტილება, ხელი შეეწყო რომანის განვითარებისთვის საქართველოში და დააარსა 10 000-ლარიანი პრემია საუკეთესო რომანისთვის. 2010-2014 წლებში პრემია ოთხ ნომინანტზე გაიცა.

2014 წელს ილიას სახელმწიფო უნივერსიტეტის აკადემიურმა საბჭომ გადაწყვიტა, რომ ყოველ 5 წელიწადში ერთხელ პრემია გაცემულიყო უცხოენოვანი რომანის საუკეთესო ქართული თარმანისთვის. გამოცხადდა კონკურსი, რომლის პირობების თანახმად 2010-2014 წლებში გამოცემული საუკეთესო თარგმანი უნდა გამოვლენილიყო.

·2010 წელს პრემია აკა მორჩილაძემ მიიღო (რომანისთვის "მამლუქი"). 2011 წელს პრემია ზაზა ბურჭულაძემ მიიღო (რომანისთვის "გასაბერი ანგელოზი"), ხოლო 2012 წელს პრემია არ გაცემულა. 2013 წელს პრემია აიღეს ანა კორძაია-სამადაშვილმა (რომანისთვის "ვინ მოკლა ჩაიკა“) და ჯაბა ზარქუამ (რომანისთვის "მკითხველი უნდა მოკვდეს"). 2014 წელს პრემია ზაზა ჭილაძემ მიიღო (უილიამ ფოლკნერის რომანის, "დროშები მტვერში“ თარგმანისთვის). 2015 წელს პრემია ნანა ექვთიმიშვილმა მიიღო (რომანისთვის "მსხლების მინდორი“), ხოლო 2016 წელს პრემია არჩილ ქიქოძემ მიიღო (რომანისთვის "სამხრეთული სპილო").