შერიგებისა და სამოქალაქო თანასწორობის საკითხებში სახელმწიფო მინისტრის, ქეთევან ციხელაშვილის თქმით, ოთხოზორია-ტატუნაშვილის სიაში მყოფ შესაძლო გარდაცვლილებზე საქმე იმ დრომდე არ დაიხურება, სანამ ეს ინფორმაცია ოფიციალურად არ დადასტურდება. ამის შესახებ ციხელაშვილმა ჟურნალისტებთან საუბრის დროს აღნიშნა.

"მტკიცებულება, რომელიც გამოდგებოდა იმისთვის, რომ საქმე დაიხუროს, ასეთი ჩვენს სამართალდამცავებს არ აქვთ. ბუნებრივია, ამიტომ ამ ადამიანების სახელები მოხვდა ამ [ოთხოზორია-ტატუნაშვილი] სიაში, მათი ბრალეულობა თუ ზოგიერთ შემთხვევაში მსჯავრდებულობა იქნეს დაფიქსირებული", - განაცხადა მინისტრმა.

ოთხოზორია-ტატუნაშვილის სიის შემადგენლობა 26 ივნისს მთავრობის სხდომაზე გახდა ცნობილი. ევროპული საქართველოს დეპუტატმა სერგი კაპანაძემ განაცხადა, რომ ოთხოზორია-ტატუნაშვილის სიაში, შეყვანილი არ არის რუსეთის ფედერაციის არც ერთი მოქალაქე, თუმცა შეყვანილია გარდაცვლილი ადამიანები.