დეველოპერული კომპანია სვეტი დეველოპმენტის ოფისში მენაშენეები ზარალის ანაზღაურებას ითხოვენ და შიმშილობენ. მათი განცხადებით, პროტესტის მიზეზი თანხის უკანონოდ მითვისება და უსახლკაროდ დატოვებაა.

აქციის ერთ-ერთი მონაწილე რუსთავი 2-თან საუბრისას აცხადებს, რომ კომპანია სვეტს ფული იმ კორპუსის მშენებლობისთვის გადაუხადა, რომელიც დეკემბერში უნდა დასრულებულიყო:

" ახლა, ორი სართულის ჩონჩხიც ძლივსაა ამოყვანილი".

მენაშენეები ამბობენ, რომ შენობის დატოვებას მოთხოვნების დაკმაყოფილებამდე არ აპირებენ, რაც გამოძიების დაწყებას, დამნაშავის გამოვლენასა და კუთვნილი თანხის დაბრუნებას გულისხმობს.

მენაშენეების პროტესტს სვეტი დეველოპმენტის დირექტორი, თორნიკე ჯანელიძე გამოეხმაურა, რომელიც ამჟამად, კომპანიის პიარ-მენეჯერის განცხადებით, ბათუმში აზერბაიჯანელ ინვესტორთან შეხვედრაზე იმყოფება:

"ჩვენ უშუალო პარტნიორებთან ერთად გვაქვს აქტიური შეხვედრები, გავდივართ ამ საკითხებს, რომ ყველა ეს საკითხი, რომელიც აინტერესებს ჩვენს მომხმარებლებს, ჩვენს მყიდველებს, ნაწილობრივ დაზარალებულ ადამიანებს, იქნას დროულად გადაწყვეტილი და განახლდეს ჩვეული რეჟიმი სამშენებლო სამუშაოების".

მენაშენეებმა სვეტი დეველოპმენტის ოფისში მისვლამდე ამავე მოთხოვნებით პროკურატურასთანაც გამართეს აქცია.