სექსუალურ შევიწროებაში დადანაშაულებული ზვიად დევდარიანის სარჩელის ერთ-ერთი მოპასუხის, იდა ბახტურიძის განცხადებით, მას სასამართლომ მიაწოდა ინფორმაცია, რომ სარჩელი წარმოებაში არ მიიღეს. ამაზე, ზვიად დევდარიანის ადვოკატი, დიმიტრი გაბუნია აცხადებს, რომ თბილისის საქალაქო სასამართლომ კანონი დაარღვია, როცა გასცა ინფორმაცია მათი სარჩელის სტატუსის შესახებ. On.ge-სთან საუბრისას ადვოკატმა განაცხადა, რომ მიზეზებზე და დამატებით დეტალებზე ისინი განცხადების გავრცელებას გეგმავენ.

იდა ბახურიძის თქმით, მან არ იცის, თუ რა ხარვეზი დაინახა სასამართლომ, ვინაიდან ეს ინფორმაცია მხოლოდ მოსარჩელე მხარეს მიეწოდება. მისივე ცნობით, წესით, იგივე ინფორმაციას უნდა ფლობდეს მოსარჩელე მხარეც.

ზვიად დევდარიანმა პატივისა და ღირსების შელახვის მოტივით 12 პირის წინააღმდეგ შეიტანა სასამართლოში სარჩელი. დევდარიანის ადვოკატმა, დიმიტრი გაბუნიამ განაცხადა, რომ 12 პირიდან მხოლო რვა პირის ვინაობას დაასახელებენ, ხოლო მისი თქმით, სავარაუდო მსხვერპლების ვინაობას არ გაამხელენ.

ზვიად დევდარიანმა უჩივლა:

  • ბაია პატარაიას - კავშირ საფარის ხელმძღვანელი;
  • იდა ბახტურიძეს - ქალთა მოძრაობის წევრი;
  • თამარ ჩერგოლეიშვილს - ონლაინგამოცემა ტაბულას დირექტორი;
  • ნინო დანელიას - ილიაუნის პროფესორი;
  • თამარ ყურაშვილს;
  • თამარ კაკაბაძეს - ევროპული საქართველოს წევრი;
  • ეკატერინე ონიანსა;
  • გამოცემა ტაბულას.

17 მარტს ქალთა მოძრაობამ ომბუდსმენის მიერ წარდგენილი სამეურვეო საბჭოს კონკურსის ერთ-ერთი მონაწილე ზვიად დევდარიანი სექსუალურ შევიწროების 10-მდე შემთხვევაში დაადანაშაულა, რის შემდეგაც დევდარიანმა საკუთარი კანდიდატურა მოხსნა.