14 ივნისს რუსეთში ფეხბურთის მსოფლიო ჩემპიონატის გახსნის ცერემონია გაიმართება, რომელსაც ქვეყნის პრეზიდენტი ვლადიმერ პუტინი სხვა ლიდერებთან ერთად დაესწრება.

ტვ დოჟდის ინფორმაციით, გახსნას დაესწრებიან ოკუპირებული ტერიტორიების დე ფაქტო პრეზიდენტები ანატოლი ბიბილოვი და რაულ ხაჯიმბა. ასევე, საპრეზიდენტო ლოჟაში ისხდებიან: აზერბაიჯანის პრეზიდენტი ილჰამ ალიევი, სომხეთის პრემიერ-მინისტრი ნიკოლ პაშინიანი, ბელარუსის პრეზიდენტი ალექსანდრ ლუკაშენკო, ყაზახეთის პრეზიდენტი ნურსულთან ნაზარბაევი.

ასევე, იქნებიან ბოლივიის, ყირგიზეთის, პანამის, მოლდავეთის, ლიბანის, პარაგვაის, ტაჯიკეთის, უზბეკეთის პრეზიდენტები და საუდის არაბეთის ტახტის მემკვიდრე.

რუსეთის პრეზიდენტის პრესმდივანმა განაცხადა, რომ ჩემპიონატის მსვლელობის პერიოდში ქვეყანას სხვადასხვა ქვეყნის ლიდერი და მინისტრი ეწვევა.

გახსნის ცერემონია 14 ივნისს მოსკოვის დროით 17:30 დაიწყება, რუსეთ-საუდის არაბეთის მატჩამდე ნახევარი საათით ადრე. ცერემონიაში მონაწილეობას მიიღებს FIFA-ს ხელმძღვანელი ჯანი ინფანტინო. ღონისძიების დროს გამოვლენ ოპერის მომღერალი აიდა გარიფულინა და ბრიტანელი მუსიკოსი რობი ვილიამსი.

სკრიპალის სკანდალის გამო ჩემპიონატს ბოიკოტი გამოუცხადა დიდი ბრიტანეთის მთავრობამ და სამეფო ოჯახმა. ამავე სკანდალის გამო, ისლანდიის ლიდერები ფეხბურთის მსოფლიო ჩემპიონატზე რუსეთში არ გაემგზავრებიან.