საქართველოს პრეზიდენტის გიორგი მარგველაშვილის აზრით, პრემიერ-მინიტრი მმართველი გუნდის ლიდერი, ანუ ბიძინა ივანიშვილი უნდა გახდეს. მისი შეფასებით, ეს ევროპული სახელმწიფოს პრაქტიკაა.

"ბიძინა ივანიშვილი, როგორც მმართველი პარტიის ლიდერი უნდა გახდეს პრემიერ-მინისტრი თუ ჩვენ ვლაპარაკობთ პასუხისმგებლიან პოლიტიკაზე და თუ ჩვენ ვლაპარაკობთ ისეთი სახელმწიფო პროცესის ფორმირებაზე, რომელიც საზოგადოებისთვის გასაგებია" - განაცხადა პრეზიდენტმა სამთავრობო ცვლილებებთან დაკავშირებით.

პრეზიდენტი გიორგი მარგველაშვილის განცხადებით, უნდა დასრულდეს "მასკარადის" პერიოდი, როდესაც უცებ ირჩევიან პრემიერ-მინისტრები, ხოლო რა პრინციპებით ირჩევიან საზოგადოებისთვისა და უცხოელი პარტნიორებისთვის გაუგებარია.

"რატომ მიდიან თანამდებობიდან წარმატებული პრემიერ-მინისტრები და რა არის ამის უკან მდგარი არგუმენტები და რა კრიტერიუმებითა და პრინციპებით შეირჩევიან ახალი პრემიერ-მინისტრები", - განაცხადა პრეზიდენტმა.

რა ხდება პრემიერ-მინისტრის გადადგომის შემდეგ

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად. პრემიერ-მინისტრის კანდიდატი 14 ივნისს უმრავლესობის გაფართოებულ სხდომაზე გახდება ცნობილი.

ასევე შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტეს