განსაკუთრებით დიდი ოდენობით ქრთამის აღების ბრალდებით სახელმწიფო უსაფრთხოების სამსახურმა 2 პირი, საგარეჯოს მუნიციპალიტეტის საკრებულოს წევრი კონსტანტინე ღოღელიანი და სსიპ ეროვნული სატყეო სააგენტოს თანამშრომელი დააკავეს.

უწყების ინფორმაციით, დაკავებულებმა საგარეჯოს მუნიციპალიტეტის სოფელ უჯარმის ტერიტორიაზე მდებარე სახელმწიფოს კუთვნილი 14 ჰექტარი მიწის და მასზე არსებული ტბის გრძელვადიანი იჯარით გადაცემაში დახმარების სანაცვლოდ მოქალაქეს ქრთამის სახით მოსთხოვეს 280 ათასი აშშ დოლარი. სუს-მა ღოღელიანი და სააგენტოს თანამშრომელი მოთხოვნილი ქრთამის ნაწილის - 30 ათასი აშშ დოლარის აღების დროს დააკავეს.

გამოძიება საქართველოს სისხლის სამართლის კოდექსი 338-ე მუხლის მე-3 ნაწილით მიმდინარეობს, რაც ქრთამის აღების ფაქტს გულისხმობს და სასჯელის სახით 11-დან 15 წლამდე ვადით თავისუფლების აღკვეთას ითვალისწინებს.