დღეს, 12 ივნისს ქართული ოცნების ოფისში პარტიის დეპუტატები შეიკრიბნენ. შეხვედრამდე გავრცელდა ინფორმაცია, რომ სხდომაზე სამთავრობო ცვლილებები უნდა განეხილათ. ამაზე საუბრობდა პარტიის რამდენიმე წევრიც.

დასრულების შემდეგ ლევან კობერიძემ განაცხადა, რომ შეხვედრა UNICEF-ის კვლევის განხილვას დაეთმო, რომელიც დღეს გასაჯაროვდა. პარტიის წევრებმა თქვეს, რომ სამთავრობო ცვლილებების საკითხი არ განუხილავთ. თუმცა, ზაქარია ქუცნაშვილის თქმით, შეხვედრაზე "შიგადაშიგ საკადრო ცვლილებებზეც იყო საუბარი".

On.ge გთავაზობთ UNICEF-ის კვლევის 7 მიგნებას, რომელზეც ოცნებაში ამბობენ, რომ 3 საათი მსჯელობდნენ.

  1. ზოგადი სიღარიბის მაჩვენებლები ქვეყანაში გაიზარდა, ძირითადად შენელებული ეკონომიკური ზრდის, უმუშევრობისა და სამომხმარებლო ფასების ზრდის გამო;
  2. შემოსავლის რეალური ზრდის გამო, ხალხი ნაკლებად მიიჩნევს თავს ღარიბად;
  3. მოსახლეობის მიერ ჯანდაცვაზე გაწეული დანახარჯები გაიზარდა. მედიკამენტების შეძენა კვლავ რჩება ჯანდაცვაზე გაწეული ხარჯების მთავარ კომპონენტად;
  4. ეკონომიკურ სირთულეებთან თავის გართმევის მიზნით, უფრო მეტი ოჯახი მიმართავს სესხს. ფინანსური ინსტრუმენტების გამოყენება (ბანკები და ლომბარდები) გაიზარდა ღარიბ ოჯახებში;
  5. საბავშვო ბაღში დასწრებასთან დაკავშირებით შემცირდა სხვაობა ღარიბ/მდიდარ და ქალაქად/სოფლად მცხოვრებ ბავშვებს შორის;
  6. ღარიბ ოჯახებში მცხოვრებ 3-5 წლის ასაკის 10 ბავშვიდან 6-ს საბავშვო წიგნები ან საერთოდ არ აქვს, ან აქვს არასაკმარისი რაოდენობით;
  7. ღარიბი მოსახლეობის 15-18 წლის ასაკის ყოველი მეხუთე ბავშვი აღარ არის ჩართული საგანმანათლებლო სისტემაში.

იხილეთ კვლევა სრულად.