ჩრდილოეთ კორეის ლიდერი კიმ ჩენ ინი უკვე სინგაპურშია, სადაც ის ორ დღეში, აშშ-ს პრეზიდენტ დონალდ ტრამპს შეხვდება.

სინგაპურის საგარეო საქმეთა მინისტრმა ვივიან ბალაკრიშნანმა ტვიტერის გვერდზე კიმ ჩენ ინთან ერთად გადაღებული ფოტო გამოაქვეყნა. BBC-ის ცნობით, აშშ-ს პრეზიდენტი კვირას, დღის ბოლოს ჩავა დანიშნულების ადგილზე.

ორი ლიდერის ისტორიული შეხვედრა სამშაბათს, 12 ივნისს სენტოსას კუნძულზე გაიმართება.

ვაშინგტონი იმედოვნებს, რომ ტრამპისა და კიმის შეხვედრა სათავეს დაუდებს ჩრდილოეთ კორეის ბირთვულ განიარაღებას.

24 მაისს ამერიკის პრეზიდენტმა, დონალდ ტრამპმა, ჩრდილოეთ კორეის ლიდერთან, კიმ ჩენ ინთან დაგეგმილი შეხვედრა გააუქმა.

შეხვედრის გაუქმების მიზეზად დონალდ ტრამპმა კიმ ჩემ ინის ბოლოდროინდელი განცხადებები დაასახელა. მან, ასევე, მადლობა გადაუხადა ჩრდილოეთ კორეის ლიდერის ამერიკელი მძევლების გათავისუფლებისთვის და მწუხარებით აღნიშნა, რომ მსოფლიომ დაკარგა კიდევ ერთი შანსი დამყარებულიყო მშვიდობა.

ბოლო თვეების განმავლობაში, ჩრდილოეთ კორეის ლიდერის რიტორიკა დასავლეთის მიმართ საგრძნობლად შერბილდა, გაიმართა კიმ ჩენ ინის და სამხრეთ კორეის ლიდერის ისტორიული შეხვედრა და ბოლო დაედო ტექნიკური ომის მდგომარეობს ორ კორეას შორის. ამ შეხვედრიდან მალევე ჩრდილოეთ კორეაში საიდუმლო ვიზიტით იყო აშშ-ს სახელმწიფო მდივანი, მაიკლ პომპეო. სწორედ ამ ვიზიტიდან მალევე, ცნობილი გახდა, რომ სინგაპურის სამიტის ფარგლებში შედგებოდა დონალდ ტრამპისა და კიმ ჩენ ინის შეხვედრა.