24 ივლისს, პროექტ Check in Georgia-ს ფარგლებში მიმდინარე, შავი ზღვის რიგით მე-10 ჯაზ-ფესტივალი დაიხურა.

ჯაზ-ფესტივლის ბოლო სტუმარი სოულის ამერიკელი შემსრულებელი, გრემის ხუთგზის ნომინანტი და ერთის მფლობელი, კომპოზიტორი, მუსიკოსი, მსახიობი და პროდიუსერი ექსცენტრული მეისი გრეი გახლდათ. ბათუმის ჩოგბურთის კლუბში მეისი გრეის კონცერტმაც ანშლაგით ჩაიარა.

მომღერალი მსმენელის წინაშე ენერგიულად წარსდგა და უშუალო კონტაქტიც დაიჭირა. ის ცეკვავდა და მოუწოდებდა მსმენელს მისი ბენდის რიტმებს აყოლოდნენ. მან ფესტივალის სტუმრებს სიმღერები ძველი და ახალი რეპერტუარიდან შესთავაზა, ასევე შეასრულა რამდენიმე ცნობილი სიმღერის ქავერი.

ყველასთვის მოულოდნელად, დაღლილი შემსრულებელი რამდენჯერმე სცენაზე დაწვა და ასე გააგრძელა სიმღერა. პატარა მსმენელებით აღფრთოვანებულმა, სცენაზე აიყვანა ორი ბავშვი და მათთან ერთად იმღერა, ცოტა ხნით სცენიდანაც კი გაიპარა და მსმენელს სხვა კაბით დაუბრუნდა. მეისი გრეიმ დიდხანს კი ალოდინა, მაგრამ ბათუმელ მსმენელს მოლოდინი გაუმართლა და კონცერტის დასასრულს მათთან ერთად Beauty in the world შეასრულა.

ჯაზ-ფესტივალი დასრულდა. ფესტივალმა სტარტი 15 ივლისს ქვინსი ჯონსის ახალი პროექტის წარდგენით აიღო. ამის შემდეგ სცენაზე მაილს ელეკტრიკ ბენდი, მის ლორენ ჰილი და პროდიჯი წარსდგა. ფესტივალის პროგრამაში ცვლილებებიც შევიდა - ჯეიმი კალუმი და ქრის ბრაუნი შემსრულებელთა სიას გამოაკლდა. მათ ნაცვლად კი მაყურებლის განწყობაზე ნიკ ვესტმა და ბასტა რაიმსმა იზრუნეს. 10-დღიან ფესტივალზე ბათუმმა 4 კონცერტს ანშლაგით უმასპინძლა.

ბათუმელებსა და ბათუმის სტუმრებს, ფასიანი კონცერტების გარდა, საშუალება ჰქონდათ უფასოდ დასწრებოდნენ Brass Band-ების კონცერტებს, რომელიც ბათუმის ბულვარში მთელი დღის განმავლობაში იმართებოდა. ჯაზ-ფესტივალის ფარგლებში, უცხოელი შემსრულებლების გარდა, ბათუმის კოლონადებთან კონცერტებს მართავდნენ ქართული ჯაზ-ბენდებიც.