"2015-2017 წლებში სამხარეო პოლიციის დეპარტამენტების სამოქმედო ტერიტორიაზე ქვეყანაში მომხდარი ავარიების 10-12 პროცენტი, ხოლო გარდაცვალების - 26-28 პროცენტი მოდის", - ამის შესახებ სახელმწიფო საგზაო მოძრაობის წესების დარღვევაზე სახელმწიფო აუდიტის დასკვნაშია ნათქვამი.

აუდიტის სამსახურის ინფორმაციით, აღნიშნული სტატისტიკის მიზეზი სამხარეო ტერიტორიების შედარებით ნაკლებად კონტროლია.

"ტერიტორიული ორგანოების სამოქმედო ტერიტორიაზე საერთოდ არ ხორციელდება ვიდეო/ფოტო მეთვალყურეობა; უბნის ინსპექტორების ერთი კონკრეტული საპატრულო ეკიპაჟის სამოქმედო ტერიტორია ყოველთვის გაცილებით უფრო ვრცელია, ვიდრე საპატრულო პოლიციის ეკიპაჟისა. აუდიტის პერიოდში უბნის ინსპექტორები კვირაში 80 საათზე მეტს მუშაობდნენ (ყოველ მე-2 დღეს მორიგეობდნენ), რაც მკვეთრად ამცირებდა მათი საქმიანობის პროდუქტიულობას", - ნათქვამია აუდიტის ანგარიშში.

აუდიტის ინფორმაციით, უბნის ინსპექტორების მდგომარეობა გაუმჯობესდა, თუმცა ჯერ კიდევ 72 საათი უწევთ მუშაობა.

ამავე ანგარიშში ვკითხულობთ, რომ უბნის ინსპექტორები ტექნიკურად უფრო ნაკლებად არიან აღჭურვილები, ვიდრე პატრულ - ინსპექტორები. მაგალითად, მათ არ გააჩნიათ სამხრე ვიდეოკამერები, ელექტრონული ქვითრის ამობეჭდვის საშუალება და ა.შ.