არჩილ ტატუნაშვილის სხეულის ექსპერტიზის შუალედური დასკვნა ცნობილია. ოჯახის ადვოკატი თამარ ავალიანი, ამბობს, რომ სამხარაულის სამედიცინო ექსპერტიზის დასკვნით, ტატუნაშვილს 100-მდე დაზიანება აღენიშნებოდა სხეულის სხვადასხვა ნაწილზე:

"ჭრილობები ხელის არეში, მტევნის არეში, მრავლობითი მოტეხილობები, 46 სისხლნაჟღენთი სხეულის სხვადასხვა მიდამოში. ასევე, სათესლე პარკის მიდამოში 38-ზე მეტი დაზიანება. ეს დაზიანებები არის სიცოხლის დროინდელი. 46 დაზიანება გამოწვეულია რაიმე მკვრივი, ბლაგვი საგნის ზემოქმედებით".

ავალიანი აღნიშნავს, რომ უნდა დაინიშნოს კომისიური ექსპერტიზა, სხვადასხვა ექიმ-სპეციალისტების მონაწილეობით, რომლებიც არჩილ ტატუნაშვილის გარდაცვალების მიზეზებს დაადგენენ და იმას, იყო თუ არა დაზიანებები სიკვდილის გამომწვევი.

ტატუნაშვილის საქმე

არჩილ ტატუნაშვილის ცხედარი ოკუპირებული ტერიტორიიდან გარდაცვალებიდან 26 დღეში, 20 მარტს გადმოასვენეს. ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. ოსური მხარის ვერსიით, ის იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ მაშინ პოზიცია შეცვალა.