შინაგან საქმეთა სამინისტრო პაატა ბურჭულაძის პარტიის სახელმწიფო ხალხისთვის ორი წევრის დაკავების შესახებ განცხადებას ავრცელებს, რომლის მიხედვითაც მათი დაკავების საფუძველი სამართალდამცველებისთვის სიტყვიერი შეურაცხყოფის მიყენება გახდა.

პარტია სახელმწიფო ხალხისთვის პრესსამსახურის უფროსი მამუკა გოგლიძე On.ge-სთან საუბარში შს სამინისტროს ბრალდებას უარყოფს და აცხადებს, რომ მისი პარტიის წევრებს პოლიციის თანამშრომლებისთვის სიტყვიერი შეურაცხყოფა არ მიუყენებიათ.

მამუკა გოგლიძის თქმით, პატრული მათი წევრების მანქანებს აჩერებდა და ჩხრეკდა, რის მიმართაც პარტიის დაკავებული თანამშრომლებმა უკმაყოფილება გამოხატეს:

"მათ ხმამაღლა გააპროტესტეს ის ფაქტი, რომ ერთი და იგივე ღამეს, ერთი და იგივე დროის მონაკვეთში, პარტიის ოფისი ვინც დატოვა ყველას მანქანა გააჩერეს და ყველა მანქანა გაჩხრიკეს და ჰქონდა პროვოკაციულ ქმედებებს ადგილი. მათ თქვეს, რომ ეს იყო უსამართლობა, რის შემდეგაც სამართალდამცველება მათ მანქანიდან გადმოსვლა მოსთხოვეს".

On.ge შინაგან საქმეთა სამინისტროს დაუკავშირდა, პარტიის მანქანების ჩხრეკის ფაქტის გადასამოწმებლად და მიზეზების დასადგენად, თუმცა შსს-ს პრესსამსახურმა აღნიშნულ ფაქტზე კომენტარი არ გააკეთა.

შსს-ს განცხადების მიხედვით, გვიან ღამით საპატრულო პოლიციის თანამშრომლებმა გააჩერეს ავტომანქანა, ალკოტესტით შემოწმების მიზნით, თუმცა, მძღოლს ალკოჰოლური თრობა არ დაუდგინდა:

"მას შემდეგ, რაც საპატრულო პოლიციის თანამშრომლებმა პრევენციული შემოწმება დაასრულეს, ავტომანქანის მგზავრებმა სამართალდამცველებს სიტყვიერი შეურაცხყოფის მიყენება დაუწყეს. პოლიციელების არაერთგზის მოწოდების მიუხედავად, ისინი არ დაემორჩილნენ მათ კანონიერ მოთხოვნას, რის შემდეგაც, საპატრულო პოლიციის თანამშრომლებმა ორივე მათგანი საქართველოს ადმინისტრაციულ სამართალდარღვევათა კოდექსის 173-ე მუხლით დააკავეს".

შსს-ს განცხადებით, პოლიციისთვის არ იყო ცნობილი დაკავებულების პარტიული კუთვნილება, თუმცა ეს მათ სამართლებრივი პასუხისმგებლობისგან არ ათავისუფლებს.

სამინისტრო ყველა დაინტერესებულ პირს მოუწოდებს, თავი შეიკავოს პოლიციასთან მიმართებაში პოლიტიკური განცხადებებისა და ინსინუაციებისგან, რაც ამ უწყების დისკრედიტირებისკენაა მიმართული.

დაკავებულების სასამართლო პროცესი ჯერ არაა ჩანიშნული.