„წვიმიანი ლაივების ქალაქი“ – ეს შეფასება ბათუმმა გუშინდელი კონცერტის დროს დაიმსახურა. ორი დღით ადრე შეტანილი პროგრამული ცვლილება და უამინდობა ხელისშემშლელ ფაქტორებად ვერ იქცა, ჯაზფესტივალმა მაყურებელს მორიგი გრანდიოზული შოუ აჩუქა.

ბათუმის ჩოგბურთის კორტებზე შესვლა ჩვეულებრივ დროს, საღამოს 8 საათზე დაიწყო, კონცერტი კი უჩვეულოდ ადრე. სცენიდან მაყურებლის განწყობაზე Renegade bras bend
ზრუნავდა. მაყურებელთან ერთან შესრულებელი სიმღერებით, ბენდმა ფესტივალის სტუმრების გული მარტივად მოიგო და დადებით მუხტიც დატოვა. მიუხედავად ამისა, მსმენელი მაინც ბასტა რაიმმს ელოდა მოუთმენლად. საკმაოდ ხანგრძლივმა შესვენებამ და „საუნდჩეკმა“ მაყურებელში მოუთმენლობა გამოიწვია თუმცა, მომლოდინეთა რიცხვი არ შემცირებულა.

სცენაზე ბასტა რაიმსი მაშინ გამოვიდა, როცა წვიმა დაიწყო. მაყურებლის უმეტესობა მზად არ აღმოჩნდა, თუმცა საწვიმარი და ქოლგები მალე მოეფინა კორტებს. ბასტამ სცენაზე გამოჩენის პირველივე წამიდან გაამართლა მაყურებლის მოლოდინი. რეპერმა მარტივად მოახერხა ხალხის ყურადღების წვიმიდან მის მუსიკაზე გადატანა. აქტიური კონტაქტი მსმენელთან, ტრადიციული ამერიკული იუმორი, საყვარელი სიმღერების ერთობლივი შესრულება და ზაფხულის წვიმა – ამ ყველაფერმა გამოიწვია ის, რომ ფესტივალის სტუმრები ქრის ბრაუნის მადლიერები იყვნენ, უფრო სწორად, მისი კონცერტის ჩაშლის.

„მადლობა ქრის ბრაუნს, რომ დღევანდელი საღამო გვაჩუქა“ – ასე შეაფასეს ბასტა რაიმსით აღფრთოვანებულებმა მსმენელებმა ქრის ბრაუნის გადაწყვეტილება, თურქეთში მიმდინარე მოვლენების გამო საქართველოში ჩამოფრენაზე უარი ეთქვა. თუმცა, საყვედური მხოლოდ ქრის ბრაუნის მიმართ არ თქმულა, ბასტა რაიმსმა ქართველ მსმენელს მისცა „შენიშვნა“ (ჩვეული ამერიკული, უხამსი ფორმით), რომ ამდენი წელი საქართველოში ჩამოსვლის შანსი არ მისცეს.

„ერთი მნიშვნელოვანი ფაქტი მინდა აღვნიშნო: ჩამოფრენის მომენტიდან საინტერესო აღმოჩენა გავაკეთე, საქართველოში ძალიან მომხიბვლელი ქალები ცხოვრობენ, მაპატიეთ ძმებო, მაგრამ ამ სიმღერას მხოლოდ ქართველ ქალებს მივუძღვნი, უკეთესი იქნება თუ მივუძღვნით ერთად“ – ამ სიტყვების შემდეგ, ბასტა რაიმსმა, მისი რეპერტუარის ყველაზე ცნობილი სიმღერა "I know what you want ” შეასრულა, თან – არაერთხელ.

"ხომ არ დაიღალე ბათუმო? წვიმა გაწუხებს? სახლში წასვლა გვინდა? "- როგორც ჩანს, მსმენელთა ნათქვამი "არა", რეპერს დიდ სიამოვნებას ანიჭებდა, რადგან კითხვა არაერთხელ დასვა და პასუხით კმაყოფილმაც არაერთხელ დახარა თავი მადლობისა და პატივისცემის ნიშნად.

დაღლილი შემსრულებელი რამდენიმე წუთით სცენიდან გაეპარა მსმენელს. ამ პერიოდში კი მაყურებლის განწყობის შენარჩუნებაზე DJ scratchator-მა იზრუნა და შეძლო კიდეც მუხტი არ დაეკარგა. ბასტა სცენაზე მალევე დაბრუნდა და უკანასკნელი ენერგია დახარჯა მსმენელისთვის, თან გააფრთხილა: "ემოციები დაზოგეთ ხვალინდელი დღისთვის, ამ სცენაზე შესანიშნავი მეისი გრეი წარდგება".

„რაც შეეხება ჩემს კონცერტს, მე აუცილებლად ჩამოვალ მეორედ, ოღონდ მხოლოდ ისთენფრომოუშენთან ვითანამშრომლებ, დამელოდე საქართველო" – ამ სიტყვებით დაემშვიდობა რეპერი მსმენელს. როგორც კონცერტის დამსწრეები ამბობდნენ, ბასტას ისევე არ ჰქონდა სცენის დატოვების სურვილი, როგორც მათ – კორტების.

Ckeck in Georgia–ს ფარგლებში მიმდინარე მე–10, ყველაზე მაშტაბური ჯაზფესტივალი დღეს, 25 ივლისს, მეისი გრეის კონცერტით დაიხურება. ჯაზფესტივალი ლეგენდარულმა ქვინსი ჯონსმა 14 ივლისს გახსნა, ამ დღეებში კი ფესტივალზე ლორენ ჰილი და პროდიჯის ლაივები სრული ანშლაგით ჩატარდა.