რესპუბლიკურ პარტიაში მიაჩნიათ, რომ ზაზა სარალიძის მხარდამჭერი აქცია პოლიტიკურ პარტიებთან შეთანხმების შემდეგ "ფსევდორევულიციურ სენარში" გადადის და მათთვის ეს მიუღებელია. ამის შესახებ პარტიამ განცხადება რამდენიმე წუთის წინ გაავრცელა.

"ღამით განვითარებულმა მოვლენებმა ბიძგი მისცა ამ სამართლიანი პროტესტის ხელოვნურად გადაყვანას ორმხრივ, რეალურად ორპარტიულ დაპირისპირებაში. ეს ის სცენარია, ყველაზე მეტად რომ აწყობს ქართულ ოცნებას, და ბიძინა ივანიშვილს, რომელიც ნაციონალური მოძრაობისგან, მიშა სააკაშვილისგან მტრის ხატის შექმნით აქამდე არაერთხელ გასულა ფონს."

პარტიაში ამბობენ, რომ გუშინდელი ღამის მოვლენების ორგანიზატორი ნაციონალური მოძრაობაა, რომელიც არსებული ვითარებას არაადეკვატურად აფასებს.

"[ნაციონალური მოძრაობა] ვერ აცნობიერებს, რომ მოძალადე სისტემის წინააღმდეგ ბრძოლის მიზანი არ არის ამჟამინდელი ხელისუფლების წინა ხელისუფლებით ჩანაცვლება. აქედან გამომდინარე, შემოთავაზებული სცენარი და ფსევდოერთიანობისკენ მოწოდება ხელს კი არ შეუწყობს, არამედ პირიქით, შეუშლის საზოგადოების კონსოლიდაციას და ამით საბოლოო ჯამში ისარგებლებს მხოლოდ ხელისუფლება", - განმარტავენ რესპუბლიკელები.

როგორც პარტიაში ამბობენ, მნიშვნელოვანია პოლიტიკური პარტიების აქტიურობა საზოგადოებასთან ერთად მიმდინარე პროცესებში, საზოგადოების კონსოლიდაცია და კონკრეტული შედეგების მიღწევა, მაგრამ ეს უნდა მოხდეს საზოგადოებაში არსებული რეალური მოთხოვნების გათვალისწინებით.

ამ ეტაპზე ცნობილია, რომ გაერთიანებული ოპოზიციის აქციას შეუერთდა ნაციონალური მოძრაობა, ახალი საქართველო, ეროვნულ დემოკრატიული პარტია და სახელმწიფო ხალხისთვის. ევროპულ საქართველოში აცხადებენ, რომ ჯერ კონსულტაციებს გადიან.

2 ივნისის ღამის მოვლენები

2 ივნისს, საღამოს, პარლამენტთან აქციის დასასრულს დაპირისპირება დაიწყო. ზვიად კუპრავამ განაცხადა, რომ ის მოკლული დათო სარალიძისთვის ბრძოლას გაგრძელებდა მამამისთან ერთად ან მის გარეშე. მისი თქმით, რჩებოდა სარალიძის მეგობრად, მაგრამ არა თანამებრძოლად. მან მოუწოდა ოპოზიციას გაერთიანებისკენ, რის შემდეგაც ეროვნულ დემოკრატიული პარტიის ოფისში პარტიებთან შესახვედრად წავიდა.

მოგვიანებით, სარალიძემ განაცხადა, რომ გავრცელებული ინფორმაცია მისი და კუპრავას დაპირისპირების შესახებ სიმართლეს არ შეესაბამებოდა. სარალიძემაც მოუწოდა პოლიტიკურ პარტიებს გაერთიანებისა და სისტემის ჩამოშლისაკენ.

აქცია #ნუმომკლავ მეოთხე დღეა მიმდინარეობს. ხორავას ქუჩაზე მოკლულის მამამ არაერთხელ მიმართა საზოგადოებას და სთხოვა მისი შვილის სიკვდილის პროტესტზე პოლიტიკურად მართული არ ეწოდებინათ.