პარლამენტის წინ მიმდინარე სოლიდარობის აქციის ერთ-ერთი ორგანიზატორი და ზაზა სარალიძის მხარდამჭერი ზვიად კუპრავა აცხადებს, რომ იგეგმება ზაზა სარალიძის დაჭრა და ეს სუს-ის მიერ დაგეგმილი პროვოკაციაა. ამის შესახებ ზვიად კუპრავამ რუსთავი 2-ის პირდაპირ ეთერში განაცხადა.

ზვიად კუპრავას თქმით, ეს ინფორმაცია თინა ხიდაშელის ძმისგან მიიღო, რომელიც სახელმწიფო უსაფრთხოების სამსახურში მაღალ თანამდებობაზე მუშაობს.

ის მოითხოვს, რომ შსს-მ დაკითხვაზე დაიბაროს თინა ხიდაშელის ძმა, რომელსაც პროვოკაციასთან დაკავშირებით მნიშვნელოვანი ინფორმაცია აქვს.

ზვიად კუპრავა ასევე მოითხოვს გამომძიებლებმა დაკითხონ ის და მოისმინონ ჩვენება იმ ინფორმაციასთან დაკავშირებით, რომელსაც ფლობს.

შინაგან საქმეთა სამინისტრო ზაზა სარალიძეს მოწმის დაცვის სპეციალურ პროგრამაში ჩართვას სთავაზობს, რადგან უწყების ცნობით, არსებობს მისი სიცოცხლის ხელყოფის საფრთხე.