ამერიკული Uber-ის ყველაზე დიდმა ევროპელმა კონკურენტმა Taxify-იმ ჯამში $175 მილიონის ოდენობის ინვესტიციის მოზიდვა შეძლო. გერმანული ავტოგიგანტი კომპანია Daimler ერთ-ერთი უმსხვილესი ინვესტორი იყო. კომპანიის საბაზრო ღირებულებამ $1 მილიარდი შეადგინა.

Daimler შეურთდა იმ ინვესტორების საკმაოდ გრძელ სიას, რომლებიც ბოლო წლების განმავლობაში, ენთუზიამზით აბანდებენ ფულს ესტონურ კომპანიაში. კომპანიაში მილიონობით დოლარი დააბანდეს ისეთმა კომპანიებმა როგორებიცაა: ჩინური Didi Chuxing, Flinc, Turo.

Daimler-ის ინვესტიცია, Taxify-ის ისტორიულად და ყველაზე დიდ ფულად დაბანდებად იქცა. წინა წელს ჩინურმა Didi-მ კომპანიაში 2 მილიონი ევრო დააბანდა.

Taxify 2013 წელს ესტონეთში 19 წლის მარკუს ვილიგმა დააარსა, მას შემდეგ კომპანიამ დიდ წარმატებას მიაღწია და სულ რამდენიმე დღის წინ საბაზრო ღირებულებამ $1 მილიარდს გადააჭარბა. თავდაპირველი ჩანაფიქრით, მარკუსი და მისი ძმა Taxify-ის მხოლოდ თავიანთ ქვეყანაში დანერგვას ფიქრობდნენ, თუმცა მალე კომპანიის მოქმედების არეალი გაიზარდა და მათ წარმატებით აითვისეს ახალი ბაზრები, მათ შორის - საქართველოც.

დღევანდელი მდგომარეობით, Taxify-ის სერვისით მსოფლიოს 25 ქვეყანაში სარგებლობენ, კომპანიაში ჯამურად 500 ათასი მძღოლი ირიცხება, წელს კომპანიის მომხმარებელთა რიცხვმა 10 მილიონს გადააჭარბა.