დემირელის სახელობის კოლეჯი საქართველოში მოქმედ მის პარტნიორ სკოლებთან ერთად (რუსთავის შოთა რუსთაველის სახელობის სკოლა-ლიცეუმი, მარნეულის დავით აღმაშენებლის სახელობის სკოლა, ქუთაისის ნიკო ნიკოლაძის სახელობის სკოლა-ლიცეუმი, თბილისის ნიკოლოზ წერეთლის სახელობის საერთაშორისო სკოლა, თბილისი სკოლა-ლიცეუმი სხივი და ბათუმის რ. შაჰინის სახელობის სკოლა-ლიცეუმი მეგობრობა) გმობენ პოლიტიკოსების მიერ გაკეთებულ ბრალდებას და ნებისმიერი ტიპის იმიჯისა და რეპუტაციის შემლახველ განცხადებებს.

სკოლების მიერ გავრცელებულ განცხადებაში ნათქვამია, რომ ისინი ცალსახად ემიჯნებიან ნებისმიერ პოლიტიკურ, კანონსაწინააღმდეგო და არასახელმწიფოებრივ საქმიანობას. მათივე განცხადებით, სკოლებში საგანმანათლებლო პროცესი ღია და გამჭვირვალეა. სწავლება მიმდინარეობს საქართველოს განათლებისა და მეცნიერების სამინისტროს მიერ დამტკიცებული სასწავლო პროგრამის მიხედვით და სკოლების ფუნქციონირება რეგულირდება საქართველოს კანონმდებლობით:

"ვგმობთ ნებისმიერ მცდელობას გარე და შიდა პოლიტიკურმა ძალებმა გამოიყენონ ჩვენი სკოლები, როგორც პოლიტიკური იარაღი. ჩვენთვის მიუღებელია ჩვენი მოსწავლეებისა და პედაგოგობის სახელის ხსენება ისეთ კონტექსტში როგორიცაა ტერორიზმი და ექსტრემიზმი.

სკოლების მთავარი მიზანი განათლებული, სახელმწიფოებრივად მოაზროვნე, ჯანსაღი და თავისუფალი მოქალაქეების აღზრდაა. შორს ვართ ნებისმიერი არასახელმწიფოებრივი ქმედებისგან და ერთგული შრომით ვემსახურებით ღირსეული მოქალაქეების აღზრდას. ორი ათეული წლის განმავლობაში ჩვენს საგანმანათლებლო სივრცეში გაიზარდნენ საამაყო ქართველები, რომლებიც წარმატებით მოღვაწეობენ, როგორც საქართველოში, ისე მსოფლიოს სხვადასახვა ქვეყანაში: ზაზა ფაჩულია, ზვიად მეტრეველი (აშშ), გიორგი კოჭლამაზაშვილი (იაპონია), ირაკლი მარღანია (აშშ), დემეტრე გვარამია (აშშ), გ. კაპანაძე (გერმანია) და სხვა მრავალი. ამ წლების განმავლობაში ჩვენმა კურსდამთავრებულებმა დიდი როლი შეასრულეს ქვეყნის აღმშენებლობაში და დემოკრატიული ფასეულობების დაცვაში".

ტელეკომპანია 25-მა გაავრცელა საქართველოში თურქეთის გენერალური კონსულის განცხადება, რომ ბათუმში შაჰინის სახელობის მეგობრობის ლიცეუმში ტერორისტებს ზრდიან.

იასინ თემისქანის თქმით, სასწავლო დაწესებულებას ტერორისტული დაჯგუფებები მართავენ, შესაბამისად იქ ბავშვები მათივე იდეოლოგიის ქვეშ იზრდებიან. კონსული ირწმუნება, რომ "ტერორისტ" ფეთულა გიულენის ორგანიზაციას საგანმანათლებლო დაწესებულებების ქსელი აქვს.