ოსკაროსან მსახიობს, მორგან ფრიმანს სექსუალურ შევიწროებასა და შეუფერებელ საქციელში ადანაშაულებენ. ამის შესახებ CNN-თან ინტერვიუში რამდენიმე ქალმა ისაუბრა.

ერთ-ერთი ქალი, რომელიც ანონიმურობას ინარჩუნებს, ამბობს რომ 2015 წელს ფრიმანთან ერთად ფილმ Going In Style-ზე მუშაობისას შევიწროების მსხვერპლი გახდა. მისი თქმით, ფრიმანი სურვილის წინააღმდეგ ეხებოდა მას. "კაბა წამოიწია და მითხრა - შევამოწმებ გაცვია თუ არა საცვლები", - იხსენებს დაზარალებული.

CNN-ის სხვა წყაროების ინფორმაციით, ფრიმანის შეუფერებელი ქცევა მხოლოდ ამ ფილმის გადაღებებზე არ გამოჩენილა. 2012 წელს, Now You See Me-ს გადაღებებზე ფრიმანი ქალებს ხშირად ესაუბრებოდა მათ სხეულზე. ერთ-ერთი მსახიობი ქალი ამბობს, რომ ისინი ცდილობდნენ დეკოლტე არ ჩაეცვათ იმისთვის, რომ ფრიმანის კომენტარები აერიდებინათ.

80 წლის მორგან ფრიმანი ერთ-ერთი ყველაზე პოპულარული და გავლენიანი მსახიობია ჰოლივუდში.

სექსუალურ შევიწროებაში, ქალებზე ძალადობასა და შეუფერებელ საქციელში აქამდე ჰოლივუდის არაერთი ვარსკვლავი დაანაშაულეს. კერძოდ ჰარვი ვაინშტაინი, ვუდი ალენი, კევინ სპეისი, ამერიკის კინოაკადემიის პრეზიდენტი, გარი ოლდმენი, ჯეიმს ფრანკო და მრავალი სხვა.