Ekhokavkaza-ს ინფორმაციით, დღეს ერევანში, პოლიციის მიმდებარე ტერიტორიაზე მყოფი აქციის მონაწილეების დაშლის შედეგად 136 პირია დაკავებული.

გასულ ღამეს პოლიციასა და მომიტინგეებს შორის დაპირისპირებისა და სამართალდამცავი ორგანოების მიერ აქციის ცრემლსადენი გაზით დაშლის შედეგად, 51 ადამიანი დაშავდა, რომელთა შორის 28 პოლიციელია.

ადგილობრივი ომბუდსმენის განმარტებით, დაშავებულთა შორის ჟურნალისტებიც არიან. მისი თქმით, ეს ფაქტი არა მხოლოდ ძალადობრივი აქტია, არამედ პროფესიული საქმიანობისათვის ხელის შეშლის მცდელობაა. მან ასევე განმარტა, რომ მის მიერ დაფიქსირებულ ყველა ფაქტს საგამოძიებო უწყებაში გაგზავნის იმისთვის, რომ აღნიშნულმა ორგანომ შესაბამისი ზომები მიიღოს.

გარდა ამისა, დღეს ქვეყნის პრემიერმინისტრმა, ოვიკ აბრამიანმა განაცხადა, რომ ხელისუფლება ყველა ზომას მიმართავს იმისთვის, რომ სიტუაციის დარეგულირება მოხერხდეს:

"ის, რაც მოხდა დაუშვებელია და უნდა დაისაჯოს, რადგან ძალადობრივი მეთოდებით ნამდვილი ცვლილებების მიღწევა შეუძლებელია. ეს სახიფათო და უპერსპექტივო პროცესია".

17 ივლისს ერევანში დამფუძნებელი პარლამენტის ლიდერის, ჟირაირა სეფილიანის მხარდამჭერმა შეიარაღებულმა თავდამსხმელებმა პოლიციის შენობა ალყაში მოაქციეს, შიგნით შეიჭრნენ და მძევლები აიყვანეს. ამბოხებულების მთავარ მოთხოვნას ერთ-ერთი ოპოზიციური დაჯგუფების - დამფუძნებელი პარლამენტის ლიდერის, ჟირაირა სეფილიანის გათავისუფლება, ქვეყნის პრეზიდენტის გადადგომა და ძალაუფლების ხალხისთვის გადაცემაა.