12 მაისს ნარკორეალიზაციის ბრალდებით დაკავებულ 8 პირს აღკვეთ ღონისძიებად პატიმრობა შეეფარდა. ამის შესახებ ჟურნალისტებს ერთ-ერთი დაკავებულის ადვოკატმა, გიორგი ფანცულაიამ განუცხადა.

ბრალდების მხარე ბრალდებულთათვის აღკვეთ ღონისძიებად პატიმრობის შეფარდებას ითხოვდა. ადვოკატებმა მოსამართლეს გირაოს სანაცვლოდ გათავისუფლების შუამდგომლობით მიმართეს.

ადვოკატი ნინო ლალიაშვილი ამბობს, რომ სასამართლომ პროკურატურის დაუსაბუთებელი შუამდგომლობის ფონზე მიიღო გადაწყვეტილება. მისივე თქმით, მისი დაცვის ქვეშ მყოფი ბრალს არ აღიარებს და დუმილის უფლებას იყენებს. როგორც ადვოკატები ამბობენ, ისინი განჩინების გასაჩივრებას აპირებენ.

დაკავებულების ადვოკატებს გაუთქმელობაზე მოაწერინეს ხელი, რის გამოც საქმის დეტალებზე საუბარი არ შეუძლიათ.

სპეცოპერაცია ბასიანსა და კაფე გალერიში

12 მაისს, გვიან ღამით კლუბ ბასიანსა და კაფე გალერიში სპეცოპერაცია ჩატარდა. როგორც შსს ამბობს, მათ რვა ნარკორეალიზატორი დააკავეს, თუმცა როგორც ირკვევა არც ერთი ბრალდებული კლუბის ტერიტორიაზე არ დაუკავებიათ.

შსს-ს საგანგებო ბრიფინგზე განაცხადეს, რომ სპეცოპერაცია იმ დროს დაიწყო, როდესაც კლუბებში ნარკოტიკული საშუალებების გასაღება უნდა მომხდარიყო.

უწყების თქმით, ისინი ბოლო 3 თვის განმავლობაში ინტენსიურ ოპერატიულ-სამძებრო და საგამოძიებო მოქმედებებს ახორციელებდნენ თბილისში მდებარე კლუბებში. მათივე თქმით, ნარკორეალიზატორთა გამოსავლენად კლუბებში არაერთი საკონტროლო შესყიდვა განხორციელდა.

გამოძიება სისხლის სამართლის კოდექსის 260-ე მუხლით მიმდინარეობს, რაც დიდი ოდენობით ნარკოტიკული საშუალების შენახვა-მოხმარება-გასაღებას გულისხმობს.