ამ წუთებში, Young Lions Georgia-ს კონკურსი მიმდინარეობს, სადაც ერთმანეთს ახალგაზრდა მარკეტერები ეჯიბრებიან. კონკურსანტებს დავალების მოსამზადებლად 24 საათი აქვთ, ისინი საკუთარი სახლებიდან და ოფისებიდან მარკეტინგულ სტრატეგიაზე მუშაობენ. მონაწილეთა ნაწილი კი, ბასიანსა და გალერიში მიმდინარე სპეცოპერაციის საპროტესტო აქციას უერთდება.

კონკურსის თემა თბილისის ღამის ეკონომიკას ეხება — გუნდებმა სწორედ ამ მიმართულების განვითარების საუკეთესო სტრატეგიაში უნდა აჯობონ ერთმანეთს.

საკონკურსო დავალების (ბრიფის) ავტორი თბილისის მერიაა. ის მონაწილეებს ღამის ეკონომიკის პროექტის ხელმძღვანელმა, სერგი გვარჯალაძემ დღეს წარუდგინა.

კანის ლომების საერთაშორისო ფესტივალი ყველაზე მასშტაბური მოვლენაა მსოფლიოს სარეკლამო სფეროში. ახალგაზრდა ლომების კონკურსი კანის ფესტივალის ერთ-ერთი ნაწილია, რომელშიც მსოფლიოს მრავალი ქვეყნის ახალგაზრდა პროფესიონალები იღებენ მონაწილეობას. საქართველოს შესარჩევ კონკურსს Cannes Lions Georgia ატარებს, რომელიც საქართველოში ფესტივალის ოფიციალური წარმომადგენელია. გარდა "ახალგაზრდა მარკეტერის" კონკურსისა, გაიმართება კონკურსები სხვა კატეგორიებშიც (Film, Print, Digital და Design). ყოველ კონკურსს ქართველი და უცხოელი სპეციალისტებისგან დაკომპლექტებული ჟიური ჰყავს.

შეგახსენებთ, რომ პარალელურად, თბილისის კლუბებში ბასიანი და კაფე გალერი, შსს სპეცოპერაციას ატარებს. ბოლო ინფორმაციით, სპეცრაზმელები ორივე კლუბში ივენთის მსვლელობისას შევიდნენ, დაკავებულია კლუბ ბასიანის ერთ-ერთი დამფუძნებელი და რამდენიმე მოქალაქე.