ყველა გზა რომში შეიძლება არ მიდიოდეს - მაგრამ თუ ევროპაში ხართ, გზების უმეტესობა მართლაც რომში მიდის.

დიზაინერებმა ფილიპ შმიდტმა, ბენედიქტ გრობმა და რაფაელ რეიმანმა ამ უძველეს შეკითხვაზე პასუხის გაცემა ახალი ინფოგრაფიკით სცადეს. პირველ რიგში, მათ ევროპის რუკა 486,713 უჯრად დაჰყვეს და თითოეული უჯრა განიხილეს რომისკენ სამოგზაუროდ საწყის წერტილად. GrapHopper-ისა და Open Street Map-ის ინფორმაციული ბაზების დახმარებით, მათ შეიმუშავეს ალგორითმი, რომელიც ნებისმიერი უჯრიდან უსწრაფეს მარშრუტს ეძებდა იტალიის დედაქალაქამდე.

იმის გათვალისწინებით, რომ რომისკენ მიმართული გზების რაოდენობა შეზღუდულია, განსხვავებული მარშრუტები ადრე თუ გვიან ერთიანდებოდნენ და ზოგიერთი გზა მეტად იტვირთებოდა, ვიდრე სხვები. რუკაზე ასეთი გზები უფრო მსხვილადაა გამოსახული. შედეგი კი მართლაც გასაოცარია, ზოგი ამ გამოსახულებას ობობის ქსელს ადარებს, ზოგიც - ნეირონულ სისტემას.

პროექტის დასრულების შემდეგ ჯგუფმა გადაწყვიტა, იგივე სისტემა გამოეყენებინა ამერიკის რუკაზე, სადაც, არც მეტი და არც ნაკლები, 10 განსხვავებული რომია. შედეგი აქაც შთამბეჭდავი აღმოჩნდა.

ფოტო: MOOVEL LAB

ყოველ კონტინენტზე არსებობს ქალაქი სახელით რომი (ან რომა). ასე რომ, ნამდვილად შეგვიძლია ვთქვათ, რომ ყველა გზა იტალიის დედაქალაქ რომში არ მიდის, თუმცა აუცილებლად მიდის რომელიღაც რომში. ცხადია, ეს პასუხი ნაკლებად პოეტურად ჟღერს, ვიდრე ცნობილი გამოთქმა, მაგრამ, რაც ამ პასუხს სილამაზეში აკლია, იმას სიზუსტით ანაზღაურებს.

რუკის ნახვა კი Roads to Rome ვებგვერდზე შეგიძლიათ.