ფინანსთა სამინისტროს საგამოძიებო სამსახურმა, სახელმწიფოს კუთვნილი დიდი ოდენობით თანხის თაღლითურად დაუფლების საქმეზე ერთ-ერთი კომპანიის ორი ხელმძღვანელი პირი, ხოლო სამსახურებრივი გულგრილობის ფაქტზე - თბილისის მუნიციპალიტეტის მერიის სამი თანამშრომელი პასუხისგებაში მისცეს.

საგამოძიებო სამსახურის განმარტებით, ბრალდებულები ერთ-ერთი კომპანიის სახელით 2017 წელს მონაწილეობდნენ და გაიმარჯვეს ქალაქ თბილისის მერიის ტენდერში. ტენდერით შეზღუდული შესაძლებლობების მქონე ბავშვთა და მოზარდთა საკურორტო მომსახურება იყო გათვალისწინებული.

კოპანიამ გაწეული მომსახურების ამსახველ დოკუმენტში ყალბი მონაცემები შეიტანეს, კერძოდ, 179 000 ლარის ღირებულების საკურორტო მომსახურება თითქოსდა გაეწია 600 პირს მაშინ, როცა დოკუმენტებში დაფიქსირებულ პირთა ნაწილს მომსახურება საერთოდ არ მიუღია, ხოლო ნაწილმა არასრულად მიიღო.

უწყების განმარტებით, კომპანიის ხელმძღვანელი პირები თაღლითურად დაეუფლნენ ქალაქ თბილისის მუნიციპალიტეტის მერიის კუთვნილ 34 775 ლარს.

ტენდერით გათვალისწინებული მომსახურების შესრულებაზე კონტროლი და ზედამხედველობა ევალებოდათ ქალაქ თბილისის მუნიციპალიტეტის მერიის ჯანდაცვისა და სოციალური მომსახურების საქალაქო სამსახურის თანამშრომლებს.

უწყების განმარტებით, მათ არ შეისწავლეს კომპანიის მიერ წარმოდგენილი დოკუმენტაცია, სადაც შესაძლო გაყალბება იკვეთება.

საქმეზე გრძელდება გამოძიება საქართველოს სისხლის სამართლის კოდექსის 180-ე მუხლის მე-2 და მე-3, ასევე 342-ე მუხლის პირველი ნაწილებით, რაც თაღლითობასა და სამსახურებრივ გულგრილობას გულისხმობს.