ერევანში პოლიციის შენობაზე გუშინ განხორციელებულ თავდასხმაში შესაძლო კავშირის გამოსავლენად 200 ადამიანი დააკავეს, რომელთაგან 50 უკვე გაათავისუფლეს. ინფორმაციას Ekhokavkaza Interfax-ზე დაყრდნობით ავრცელებს.

სამართალდამცავები დაკავებულებს არა მხოლოდ ზემოაღნიშნული მიზეზის გამო ამოწმებენ, არამედ იმისთვისაც, რომ გამოავლინონ მათი შესაძლო კავშირი ოპოზიციურ სამოქალაქო ინიციატივა - დამფუძნებელ პარლამენტთან, რომლის მეთაურიც ჟირაირა სეფილიანია.

გუშინ ერევანში, ერებუნის რაიონში, შეიარაღებული დაჯგუფება სატვირთო მანქანებით პოლიციის ტერიტორიაზე შეიჭრა და შენობის აღება სცადა, რის შედეგადაც ერთი პოლიციელი გარდაიცვალა, 3 კი დაშავდა.

ამბოხებულების მთავარ მოთხოვნას სომხეთის ოპოზიციური სამოქალაქო ინიციატივის - დამფუძნებელი პარლამენტის კოორდინატორის, ჟირაირა სეფილიანის გათავისუფლებაა, რომელიც იარაღის უკანონო შეძენა-შენახვისათვის არის ბრალდებული. ამასთანავე, თავდამსხმელები ითხოვენ, გადადგეს ქვეყნის პრეზიდენტი და ძალაუფლება ხალხს გადაეცეს.

გამოძიების ინფორმაციით, სეფილიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას.

მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.

ამ დროისთვის ხელისუფლების წარმომადგენლები თავდამსხმელებთან მოლაპარაკებებს ისევ აწარმოებენ იმისთვის, რომ უარი ათქმევინონ მათ მთავარ მოთხოვნაზე, რომელიც სეფილიანის გათავისუფლებას ეხება, ასევე ის 6 პოლიციელი გაათავისუფლონ, რომელიც მათ მძევლად გუშინდელი დღიდა ჰყავთ აყვანილი.